CEBU - Bisan pa man sa pagka-injured sa walang tudlo sa second round, milampos gihapon ang International Boxing Federation (IBF) flyweight king Nonito “Filipino Flash” Donaire Jr.(20-1,13KOs) sa pagdepensa sa iyang bakus pinaagi sa sixth round TKO batok ni South African challenger Moruti Mthalane(22-2, 15KOs) sa ilang away sa undercard sa “ The Final Impact” kagahapon didto sa Mandalay Bay Resort and Casino sa Las Vegas, Nevada.
Si referee Joe Cortez mipahunong sa away sa nahibiling 1:31 sa sixth round dihang nakita sa ringside physician nga grabe ang gisi sa walang mata sa South African.
”I hit him with a right straight, and I saw he got cut big,” matud pa ni Donaire.
Si Donaire kinsa nagsul-ob og usa ka Arthro headband sa iyang pagsaka sa ring maoy naglabaw sa iskor sa tulo ka hurado sa wala pa niya gipahunong si Mthalane. Atol sa second round nakahiagum ang Fil-American boxer og injury sa walang tudlo niini nga maoy nakapaaghat kaniya nga gamiton ang iyang tuong kamot aron pagkulata ni Mthalane.
Tungod sa maong kadaugan kusog karon ang hugon-hugon sa umaabot unyang rematch ni Donaire sa Armenian knock-out artist nga si Vic “Raging Bull” Darchinyan.
Sa iyang bahin ang Top Rank Promoter nga si Bob Arum nagkanayon usab nga gitakda na ang sunod nga away ni Donaire nga mahitabo karong Marso didto sa Macau o sa Manila. Nagkanayon si Arum nga gipilian pa nila kung kinsa ang sunod ikasangka sa 25-anyos nga boksidor. Lakip sa mga gipilian mao sila si Jorge Arce ug ang World Boxing Organization (WBO) superflyweight champ Fernando Montiel.
Sa main event sa maong away, midaug pinaagi sa unanimous decision ang super welterweight nga si Julio Cesar Chavez Jr.(37-0, 29KOs) batok ni Matt Vanda (39-8, 22KOs) sa ilang rematch, samtang milampos usab pagdepensa sa iyang bakus ang World Boxing Association (WBA) interim flyweight champion Jorge Arce (51-4-4, 39KOs) dihang iyang gipukan si Isidro Garcia (25-9, 15KOs) pinaagi sa usa ka fourth round TKO. – BANAT NEWS