Melindo andam na batok Fundi

CEBU - Isugal ni World Boxing Organization (WBO) Asia-Pacific mini flyweight champion Milan Melindo ang iyang titulo ug ingon man ang world-rating dihang iyang sangkaon ang bantugan ug kuyaw nga African warrior Juma Fundi sa Tanzania karong Oktobre 30 sa Atrium sa Limketkai Mall sa Cagayan de Oro.

Ang maong boxing card gipasiugdahan sa ALA Promotions uban sa suporta ni Misamis Oriental Governor Oscar Moreno, kinsa maoy hagdanan pagbanhaw sa boksing didto sa Mindanao.

Si Melindo mopakita sa iyang abilidad atubangan sa iyang katagilungsod batok sa bisitang si Fundi, kinsa nga adunay walo ka daog sa siyam niya ka away, diin ang bugtong niyang pilde batok ni WBO Oriental kingpin Richie Mepranum. 

Sila si Melindo ug Fundi pulos gikan mikulit og impresibong nga kadaugan sa katapusan nilang away. Si Melindo nidaog batok ni world-rated Carlos Melo sa Panama sa ilang away alang sa WBA Intercontinental lightweight diadem niadtong Hulyo ning

tuiga.

Wala sab magbitin si Fundi, kinsa mikulit og daog pinaagi sa pagpaundang sud lang sa unang hugna batok sa iyang kadugong Tanzania Sadat Miyeyusho niadtong Agosto.

Sa supporting main event, si WBO Asia-Pacific Youth champion Jason Pagara moaway alang sa bakanteng Philippine lightweight title batok ni RP No. 4 contender Arnel Porras sa General Santos.

Lain pang mopakita’g aksiyon mao si Weng Haya batok Jaime Barcelona, Romeo Jakosalem sa Davao City batok William Jorge sa Leolet Stable ug ABS-CBN idol champion Jerson Mancio batok ni Charlie Cabilla.  (BANAT NEWS)