Guardo nangu sa Eyeberry

CEBU - Daling miulbo ang kainit sa Eyeberry ‘86 dihang mipatuasik sa ilang nagdilaab nga opensiba aron pagpukan sa Kidneycare, 79-65 sa nagpadayong aksiyon sa 2008 University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North campus gym.

Ang team owner ug sports patron nga si Jonathan ‘Atan’ Guardo miduslit og season-high 20 puntos alang sa Eyeberry-sponsored Batch ‘86 nga wala na molingi pa human mirehistro og 25-18 paghuman sa first quarter.

Si Arturo Pepito ‘Pitoy’ Mata mihaling og 12 puntos alang sa Eyeberry nga mi-abante og maayo paghuman sa first half, 40-29.

Namintinar sa Eyeberry ang ilang 11 puntos nga labaw sa ikatulong kuwarter, 59-48 sa wala pa nila maangkon sa hingpit ang 14 puntos nga kadaugan.

Sa laing duwa, ang perennial champion B-Meg ‘85 nimasaker sa San Sebastian, 93-60 sa pagpangulo ni Lou Regidor, kinsa mibugha og 24 puntos. Si Regidor, ang kanhi pro ug commercial star nagsilbe karon isip assistant coach sa multi-titled M. Lhuillier Kwarta Padala-Cebu Niños.

Si Virgil ‘Bing’ Pua mikimada og 15 puntos, samtang sila si Jone Sepe ug Emil Mercado nagkumboya og 23 puntos alang sa B-Meg, kinsa milubong sa San Sebastian og 20 puntos sa first quarter, 38-18. Mitubo pa ang labaw ngadto sa 28 puntos, 75-47 sa wala pa nila pahamtangi ang San Sebastian og 33 puntos nga lubong paghuman sa regulasyon.

Ang 2008 USCBHABA season gipaluyohan sab sa Uniherb Philippines, ang tiggama sa nabantog nga food supplements sama sa Arthro, Heartvit, Kidneycare ug Diabet.

PUNTOS MATAG USA

Unang duwa:

Eyeberry (79) - Guardo 20, Mata 12, Congson 11, Catubig 11, Romero 8, Avila 7, Gabas 5, Villamor 3, Monsanto 2

Kidneycare (65) - Simene 16, De los Sientos 14, Cañete 8, Tabares 6, Bajarias 6, Delantar 5, Honorio 3, Aloben 3, Burela 2

Ikaduhang duwa:

B-Meg (93) - Regidor 24, Pua 15, Sepe 13, Mercado 10, Bacaltos 9, Sistoba 6, Estrada 4, Cabrera 4, Sosobrado 4, Ramos 2, Aznar 2

San Sebastian (60) - Semene 16, Tabares 13, De los Santos 13, Honorio 12, Cañete 4, Delantar 2  (BANAT NEWS)