CEBU - Mobalik na ang aksiyon sa 2008 MS Motosuit Motocross Series human mahilom dul-an na sa duha ka bulan pinaagi sa pagpahigayon og sunod-sunod nga legs nga sugdan pinaagi sa Mayor Avelino Gungob Sr. Cup karong adlawa diha sa bag-ong natukod nga racetrack sa Consolacion.
Ang kalihukan magsilbeng 12th leg sa series ning tuiga ug sundan kini sa 13th leg nga ulohan og “Keiz BJ Motorsales Cup” ugma didto sa Caduawan, Tabogon.
Kapin sa 60 ka daredevils ang mopakita’g aksiyon ning duha ka adlaw nga kompetisyon nga gipaluyohan sa Imarflex Evvo, Castrol, RMO, Reliance, Keiz BJ Motorsales ni Seigfred Ornopia, Cebu Progress, Chowking-Consolacion ug Consolacion Councilor Taboy Abenales.
Si Glenn Aguilar, ang image model sa MS Motosuit, maoy mangulo sa mga competing riders ning duha ka adlaw nga kompetisyon. Moapil sab ang iyang anak nga si McLean, kinsa mopakita’g aksiyon sa labing unang higayon dinhi sa Sugbu.
Ang masaarong si McLean mosuway og sunod sa tunob sa iyang amahan nga si Glenn, ang 10-time national titlist ug one-time Asian motocross champion. Si McLean mobanat sa mini class.
Sa laing bahin, si MS Motosuit big boss Lou Ornopia ug 2007 “Sportsman of the Year” awardee sa Sportswriters Association of Cebu (SAC), naglaraw nga mohimo og night supercross diha gihapon sa Consolacion diin iyang gihulagway nga mas daku itandi sa kanhi racetrack sa Boardwalk sa North reclamation area. – BANAT NEWS