Nahanaw mga pangandoy

CEBU - Gisanta sa University of San Jose-Recoletos (USJ-R) Spiking Jaguars ang pangandoy sa two-time champion University of San Carlos nga ma-grandslam pinaagi pagdaog sud sa upat ka set aron paglangkat sa collegiate men’s title sa 8th Cebu Schools Athletic Foundation, Inc. (CESAFI) volleyball event niadtong Miyerkules didto sa USC-main gym.

Ang maong kadaugan nakahupay sa galamhan sa ilang head coach Grace Antigua, kansang ilang women’s squad napakyas sa ilang kampanya alang unta sa “four-peat” human miluhod sa University of Southern Philippines Foundation (USPF) sa lima ka sets.

Ang Spiking Jaguars napilde sa unang set, apan mibawos kini aron haruson ang sunod nga tulo ka sets, hinungdan nga nahanaw ang damgo sa USC nga mohipos sa ilang ikatulong sunod-sunod nga korona.

Sikit kaayo ang gipakitang duwa sa duha ka karibal pagsugod, diin ang USC ni coach Norvie ‘Making’ Labuga alang sa ilang 21-19 nga labaw. Sila si Ken Abunda ug Ariel Carumba mibawos aron hatagan ang USJ-R og dos puntos nga labaw, 23-21, apan ang two-time MVP awardee nga si Roderick Arenasa mibagdok og 4-0 aron dag-on sa Carolinians ang opening set, 25-23.

Ang USJ-R misugod sa pagpakita sa ilang ka-agresibo sa second set uban nilang Carumba, Louijie Tipgos ug Jacky Yrog-Irog nga mibombardiyo sa USC aron pag-angkon og 18-11 nga bentaha.

Ang trayanggulo nilang Arenasa, Jerone Maestre ug Kennith Bensig milusad og mini-rally aron pagkitkit sa biya, 14-19, apan didto ra kutob ang ilang maayong labok kay ang USJ-R mipatuman og 6-0 rally, 25-14 aron pagtabla.

Nadasig ang USC sa pagsugod sa third set human miposte og 8-2, apan wala kini magdugay sa ilang mga kamot kay nakatabla ang USJ-R, 12-all pinaagi nilang Carumba ug Tipgos.

Sukad niadto, nahitabo ang   kulbahinam nga engkuwentro ug ang bugtong nahimo sa USC mao ang pagsikit sa iskor, 16-17 kay ang USJ-R mipabuto og 8-1 run aron pagsakmit sa 25-17 nga kadaugan.

Human magtabla, 9-all sa final set, ang Spiking Jaguars miinat sa ilang labaw pinaagi sa 6-0 run alang sa ilang 15-9 nga bentaha. Sukad niadto, ang USC wala na makarekober pa ug naangkon sa USJ-R ang 25-17 nga kadaugan.

Sa laing bahin, ang University of the Visayas (UV) mipukan sa early favorite USPF sud sa upat ka sets, 25-23, 25-21, 15-25, 25-17, samtang ang Southwestern University (SWU) mipukan sab sa USC sud gihapon sa upat ka sets, 20-25, 25-14, 25-23, 25-13 aron pag-angkon sa ikatulong dapit sa men ug women’s divisions. – BANAT NEWS