Black, White, Red teams mirehistro og daog

CEBU - Nagmadaugon ang Black, White ug Red teams batok sa tagsa-tagsa nila ka kaatbang sa nagpadayong Still Fighting Athletic Association (SFAA) Inter-color basketball tournament didto sa CEC gym.

Ang Black mipukan sa Green 91-82, samtang ang White naka-ipsot sa Blue team sa iskor, 78-75. Ang Black ug White nagkupot karon og 2-1 win-loss records.

Sa laing bahin, ang Red mipahamtang sa labing unang pilde ngadto sa Gold sa iskor nga 64-57.   Ang Red sayo kaayong milabaw og daku, 25-8 sa first period. Sa giya nilang Renato Garcia ug Teloy Abanes nainat ang labaw sa Red ngadto sa 24 puntos, 38-14 sa halftime.

Hinuon, nakabawi ang Gold pinaagi sa paglusad og 21-6 run aron pagkitkit sa labaw ngadto na lang sa dos puntos, 52-54 sa katapusang dos minutos sa duwa.

Si Jun Ando ug Jun Cleofe maoy nangulo sa rally sa Gold, apan ang three-point artist sa Red nga si Risel Yu ug Sam Sacol miladlad sa ilang mainitong opensiba aron ihatod ang ilang koponan ngadto sa kadaugan.

Si Abanes maoy nangu sa Red pinaagi sa iyang 15 puntos, samtang si Ando mao sab ang topscorer sa Gold sa iyang 20 puntos.

 Si Jun Seno maoy nangulo sa Black sa iyang 29 puntos, gisundan ni Ricky Lumayag sa iyang 17 puntos ug Nestor Kyamko nga miamot og 12 puntos.

Ang Green gipangulohan ni Denie Pesquera bitbit ang 26 puntos, samtang si Archie Sabellano mihakot og 16 puntos.

Si Nelson Sabellano mi-iskor og 20 alang sa White, samtang si Turo Ricarte mikimada og 21 puntos alang sa Blue.

Puntos Matag Usa

Unang duwa

Red (64) -- T. Abanes 15, Yu 12, Garcia 10, Sacol 7, Detuya 7, Estrada 6, Limatog 6, Bongon 1

Gold (57) -- Ando 20, Cleofe 11, Piloton 10, Abonitalla 8, Ponseca 4, Bejaresco 4

Ikaduhang duwa:

Black (91) -- Seno 29, Lumayag 17, Kyamko 12, Dayondon 11, Mata 8, Banilad 6, Ocampo 5, Edera 3

Green (82) -- Pesquera 26, Sabellano 16, Lasque 8, Desierto 7, Ladonga 6, Magno 4, Unabia 4, Espona 3, Nuñez 2, Batad 2

Ikatulong duwa:

White (78) -- N. Sabellano 20, Emol 17, Ladonga 12, Godinez 9, Cabangbang 7, Malayog 4, Castañares 4, Padin 3, Rebuya 2

Blue (75) -- Ricarte 21, Estrada 15, Mirasol 12, Viscayno 12, Pitogo 9, Gallarde 4, Abanes 3, Kue 1. – BANAT NEWS