Golden Eye nakatag-iya katapusang luna sa final

CEBU - Nasakmit sa FYA Golden Eye dribblers ang katapusang luna sa finals human gipilde ang FYA Viking Haulers, 91-87 sa   F. Llamas Youth Association (FYA) 1st Coach Rady Cup basketball tournament niadtong Huwebes sa gabii didto sa Vicente Sotto Memorial gym sa barangay Punta Princesa, ning dakbayan.

Ang Golden Eye nagkatabla sa ilang biktima, apan nakaangkon og katungod aron moharong sa FYA Warriors sa kampiyonato pinaagi sa simple tie. Ang Warriors napukan sa Lakers, 90-92 sa usa ka non-bearing game.

Grabe kaayo ang paningkamot nilang Janus Abellana ug Dominic Enriquez diin nagkumboya kini og 52 puntos alang sa Golden Eye. Si team captain Noel Medalle nalipay sab sa maong kadaugan bisan og igo lang kini mihagdaw og singko puntos.

Si Arnel Trinidad, ang presidente sa FYA naningkamot sab sa maong duwa aron ihatod ang iyang koponang   Viking Haulers ngadto sa finals apan igo lang siya nakahipos og sayes puntos. Si Tata Laborte maoy nangu sa Viking Haulers pinaagi sa iyang 26 puntos ug gisundan ni Junbel Llegunas nga mitampo og 14 puntos.

Sa laing bahin, ang kanhi USJ-R Jaguar nga si Giovanni Canceko maoy nangulo sa Lakers sa iyang 24 puntos, gisundan ni Wendell Rollon sa iyang 19 puntos.

Si Dan Enriquez mao sab ang nangulo sa Warriors pinaagi sa iyang 19 puntos, samtang sila si Crissar Llegunas ug Christopher Marata mihipos og 14 puntos matag usa.  

Ang finals duwaon ugma sa mao gihapon nga binyu.

Gilaumang mosaksi sa kampiyonato mao si Punta Princesa Brgy. Captain Rolly Diorico ug barangay councilor Bugoy Atillo ug sports patron Rady Abarintos.

Puntos Matag Usa

Unang duwa:

Lakers (92) -- Canceko 24, Rollon 19, Enriquez 18, Rama 12, Tolentino 6, J. Canceko 5, Cañete 4, Garcia 2, Jao 2

Warriors (90) -- Enriqyez 19, Llegunas 14, Marata 14, Abella 11, Cadungog 10, Grant 10, Alob 3, Cambarijan 3, Trinidad 2, Pacaña 2, Cadungog 2

Ikaduhang duwa:

Golden Eye (91) -- Abellana 30, Enriquez 22, Marata 14, Medalle 5, Rama 5, Bas 5, Arias 4, Beltran 2, Bantiling 2, Jobern 2

Viking Haulers (87) --Laborte 26, Llegunas 14, Medalle 9, Camacho 8, Solon 7, Zapata 6, Trinidad 6, Arreglo 6, Cal 5. – BANAT NEWS