Rain or Shine gipukan sa Alaska

CEBU - Gipadayon sa Alaska Aces ang ilang pagpanghakot og daog dihang ilang gipaluhod ang Rain or Shine Elasto Painters sa iskor nga 91-84 sa nagpadayong aksiyon sa KFC-PBA Philippine Cup didto sa Araneta Coliseum, Quezon City. Ang kanhi Most Valuable Player (MVP) nga si Willie Miller mibugha og 21 puntos uban ang 10 ka rebounds aron pangulohan ang Alaska sa ilahang ikaupat nga sunod-sunod nga kadaugan. Sayung nigana ang opensiba sa Alaska sa first half aron ilubong ang batan-ong Elasto Painters, 52-39. Ang produkto sa Ateneo de Manila University (ADMU) nga si L.A Tenorio mipabuto usab sa iyang 18 puntos aron abagan ang iyang koponan ngadto sa kadaugan.

Misuway og gukod ang Elasto Painters sa nahibiling siyete minutos sa final period dihang mipatusak si Rob Wainwright og tulo ka three-point shots aron ingkiban ang labaw sa Alaska, 77-75, apan wala kini musalir sa league leader nga Alaska dihang misumbalik kini og rally sa pagpangulo ni Miller ug Tony De la Cruz nga mikumboya og 12 puntos sa fourth quarter.

Ang sentro nga si J.R Reyes kinsa mikutlo og 16 puntos samtang ang rookie nga si Gabe Norwood midunol sa iyang 12 puntos alang sa Elasto Painters nga nagkupot karon og 2-2 win-loss nga baraha.

Padayon pang nagkumbati ang Barangay Ginebra Kings batok sa nagkumbitay nga Red Bull Barakos sa pagsulat niining balita. – BANAT NEWS