Aloguinsan Mayor's Cup semis sugdan na

CEBU - Iladlad na sa upat ka teams ang ilang tinagoang abilidad sa pagsugod sa semifinals sa 1st Aloguinsan Mayor’s Cup basketball tournament sa Aloguinsan hardcourt.

Ang star-studded Mandaue team nga pangulohan nilang ex-pros Dale Singson, Gilbert Demape ug Anton Villoria makigsangka sa Survivors alang sa unang duwa, samtang ang Talavera nga pangulohan ni Woodrow Enriquez makigtigi sa CCC-CSD nga pangulohan sab ni Jerry Jaca.

Ang mga winners maoy magbagat sa tinaktakay nga kampiyonato ugma didto gihapon sa Aloguinsan hardcourt.

Ang Mandaue maoy lig-on nga contender tungod sa ilang tulo ka guards nga sila si Singson, Demape ug Villoria uban ni kanhi UV Green Lancers power forward Rey Cantona, apan dili masayon-sayon ang mga batos sa Talavera nag-abot man ang mga batan-on ug mga beterano nga naglakip ni Enriquez Jayford Rodriguez, Ariel Mepaña ug Vermini Tangarorang.

Sa upat ka semifinalists nga mag-ilog sa P75,000 grand prize, ang CCC-CSD ni coach Boboy Cal gituohang maoy molangkat sa korona tungod sa kadaghan sa ilang mga beteranong magduduwa nga timonan ni Jaca.

Si Romy Cal, ang CCC-CSD team consultant nagkanayon nga andam ang ilang team nga moatubang sa dakung hagit. Mao kini ang labing una ug labing daku nga torneyo nga ilang gisalmotan gikan sa pagtukod niini nga dul-an na sa tulo buwan ang milabay.

Ang ubang mga sakop sa CCC-CSD mao ang magduduwa kanhi sa MBA nga si Jan Montalbo, Roy Arnado, Jared Kane Abatayo, Raul Redulosa, Wilbert Sayson, Francis Mangyao ug top gunner Aldrin Ocañada. 

Ang CCC-CSD nakasulod sa semifinal dihang ilang giharos ang eliminasyon (3-0). – BANAT NEWS