Springdale, Camp Lapulapu nagbahin sa daog

CEBU - Nagbahin sa daog ang PAREF-Springdale ug ang Camp Lapulapu sa Unit Meet qualifying round basketball tournament niadtong Domingo didto sa Springdale gym sa barangay Lahug, ning siyudad.

Ang Camp Lapulapu naka-eskapo bitbit ang 49-48 nga kadaugan batok sa Springdale sa elementary division. Apan ang secondary team sa Springdale ni coach Ryan Betia midaog batok sa Camp Lapulapu nga nagligas gihapon og uno punto, 53-52 pinaagi sa buzzer-beating shot ni Albert Villegas.

Si Villegas mi-iskor og 10 puntos, apan si Jiggy Sy maoy nangu sa Springdale sa iyang 11 puntos.

Sa mga duwa sa hapon, nagpakita sa ilang kabangis ang Springdale diin ilang gilubong ang Busay National High School sa iskor nga 74-58 diin si Sy mao gihapon ang nangu sa opensiba sa iyang 20 puntos.

Ang makampiyon sa Unit Meet maoy morepresentar sa Lahug sa City Olympics nga gikatakda sa ikaduhang semana sa Nobiyembre diha sa Cebu City Sports Center. (BANAT NEWS)