CEBU – Niadtong Hunyo 23, usa ka semana human maangkon sa Boston Celtics ang ilang ika-17 nga korona sa NBA dihang ilang girapido ang Los Angeles Lakers, ang SPORTSgab mipawagas og lindog nga giulohan og Numerology. Ang NBA Finals sa 2008, gitapos sa Celtics sa Hunyo 17 nunot ang paghakot og 17 ka korona, ang labing daghan sa kasaysayan sa NBA.
Ubay-ubay sa akong mga higala ang nahimuot nagbasa kay lagi makaingon sila sa ilang kaugalingon nga tinuod baya. Misaler ang pagsumada o sumpay-sumpay sa mga numero matud pa nilang Rady Abarintos, hepe sa Assessment Division sa Bureau of Customs, Noel Medalle, Dodong Guden sa DYRF ug akong manghod nga Gigi Quindao, kinsa atua na nanimuyo sa barangay Owak, Ormoc City.
Ang pagkamatuotuohon o "superstitious belief" sa mga Insik nanakod sab sa mga Katsila ug naapil na sab niini ang mga Pinoy.
* * *
Niadtong Miyerkules sa gabii, dili numero 17 ang naigo sa swerte kon dili numero 8. Ang tukmang petsa sa miaging Miyerkules, Oktobre 8, 2008.
Duwa kadto sa Cebu Schools Athletic Foundation, Inc. (CESAFI) finals UV Green Lancers batok USJ-R Jaguars diin midaog ang Lancers, 73-68 alang sa ilang ikawalo nga korona.
Pipila lang ka gutlo human sa duwa, atong gipangutana si coach Elmer "Boy" Cabahug kun unsa gyu'y ilang buot gipasabot niadtong ilang itom nga panapton nga gimarkahan og 8 nga gitahi gyud dapit sa tuong abaga sa tanan nilang uniporme gikan gyud sa pagsugod sa torneyo niadtong Agosto 2.
Sa akong kaugalingon nga pagtimbang-timbang, aduna gyu'y dakung hinungdan nganong ila man kadtong gipasundayag. Ug didto akong nasayran ang tinuod gikan mismo ni coach Boy nga ang numero 8 maoy jersey number sa ilang kauban nga si Lucky Pitogo kinsa gipusil patay niadtong Abril 17, 2008 didto sa lungsod sa Consolacion sa wala pa mailhing mga mamumuno.
Ako nagtuo nga gitagna nang daan ni coach Boy nga sila maoy mahimong kampiyon sa CESAFI, apan mas daku pa diay ang kahulogan niadtong numeroha.
Matud pa ni coach Boy nga ila nang daan gipahinungod ang ikawalo nga season sa CESAFI ngadto ni Pitogo. Ako nga otro sab ka mahiligon og sumpay-sumpay og numero wala makatingog ug igo na lang sa paglingo-lingo.
Apan ang wala sab himatikdi ni coach Boy nga dili diay tanang nagtangag og 8 debuynas alang kanila. Niadtong Agosto 2, napilde ang UV sa USC Warriors sa iskor, 80-76. Ang Agosto mao say ika-walong buwan sa kalendaryo.
* * *
SG Miscellaneous: October is a Rosary Month. My son Matt Erikson Malagar would like to give special mention to Trizia Zybel Ramos of USC-BED South Campus on her forthcoming birthday on October 15. Other October celebrants are Ma. Angela Palacio on Oct.11 and Ma. Armina Solis on Oct.12. Both are classmates of my 13-year old daughter Nicole Malagar of 1st Year Blue. – BANAT NEWS