Darchinyan mibahad

CEBU – Masaligon si Interational Boxing Federation (IBF) super flyweight champion Vic Darchinyan nga iyang matumba si WBA/WBC super flyweight champion Cristian Mijares dihang mag-abot ang ilang dalan karong Nobiyembre 1 sa Home Depot Centre sa Carson, California. 

"I’ve said that many times before big fights, Luis Maldonado, Irene Pacheco, Dimitri Kirilov - I knocked them out. When I promise I will knock someone out, I keep my promise," matud pa ni Darchinyan.

Apan si Darchinyan may pobya sa away tungod kay nisaad kini nga iyang tumbahon si Nonito 'The Filipino Flash' Donaire sa ilang title fight niadtong Hulyo 17, 2007 didto sa Connecticut, apan misumbalik kini og maoy natumba sa ikalimang hugna.

Sa maong kadaugan, si Donaire maoy nidaog sa "Knockout of the Year" award dili pa dugay.

Mibahad sab si Darchinyan nga iyang tumbahon si Z 'The Dream' Gorres sa ilang IBF title eliminator sayo ning tuiga, apan ang maong away nasangko sa controversial draw.

Si Darchinyan nidaog sa IBF flyweight title pinaagi sa pagpukan ni Irene Pacheco ug napilde kini ngadto ni Donaire.

Si Darchinyan nidaog sa IBF super flyweight title pinaagi sa fifth round stoppage ni Dimitri Kirilov. – BANAT NEWS