USJ-R, SWU milansang upat ka daog

CEBU - Nikulit sa ilang nagkadinang upat ka daog ang defending women's champion University of San Jose-Recoletos (USJ-R) ug Southwestern University (SWU) sa pagpadayon sa Cebu Schools Athletic Foundation, Inc. (CESAFI) volleyball event kagahapon didto sa Aznar Coliseum.

Ngilngig kaayo nga nakaduwa ang mga batos ni coach Grace Antigua aron pagmakmak sa University of Cebu (UC), 25-19, 25-18, 25-15.

Sa laing bahin, ang SWU mipukan sa University of San Carlos, 25-16, 25-20, 25-22 aron paglansang sa ilang sagunson nga kadaugan.

Ang kanhi RP Youth Team captain nga si Genie Sabas maoy nangulo sa kadaugan sa USJ-R. Gitimbangan sab siya nilang Michelle Simbajon, Cristy Aina Laroga, Joy Bonita, Carla Garces, Avegale Getuaban ug kanhi USC Lady Warrior women's basketball team member Hannah Singson.

Ang Sportswriters Association of Cebu (SAC) awardee nga si Danika Gendrauli, Lorie Mae Layno, Ma. Luelyn Paciño ug Elizabeth Emnace mipakita sab sa ilang maayong duwa alang sa SWU.

Ang USJ-R ug SWU nanglantaw sa ilang ikalimang daog batok sa managlahing kaatbang karong adlawa diha gihapon sa Aznar Coliseum.

Ang USJ-R modumog sa Cebu Doctors University samtang ang SWU mohamag sa University of Southern Philippines Foundation.

Sa men's division, ang USJ-R mao karon ang nag-una sa liderato human miposte sa ilang upat ka daog pinaagi sa pagpukan sa USC. - BANAT NEWS