CEBU - Una sa tanan, akong mainiton nga pahalipay ngadto sa University of the Visayas (UV) Green Lancers sa pagsakmit nila sa ikawalong sunod-sunod nga korona sa CESAFI seniors basketball. Naangkon sa UV ang maong makasaysayanong dungog niadtong Oktobre 8, 2008.
Ang makapanglimbawot sa balhibo mao nga 8 ang numero sa mipanaw nilang kauban nga si Lucky Pitogo, nga gipusil patay sa wala pa mailhing mamumuno pipila ka bulan ang milabay. Mao nang gipahinungod sab sa Lancers ang ilang kampiyonato kaniya.
Niadtong 2007, giangkon sa UV Lancers ang ikapito nilang korona sa ika-77 nga adlaw nga natawhan sa labing daku nilang dumadapig ug tigpaluyo, ang presidente sa UV ug Cebu First District Congressman Eduardo 'Eddiegul' R. Gullas. Sa sunod tuig, makakulit kaha og triple grandslam kon siyam nga sunod-sunod nga titulo ang UV? Nangutana lang ko numero nuybe man gud ang paboritong numero ni coach Elmer 'Boy' Cabahug. Unya sa unang CESAFI season, milansang sila og all-time record nga 36 ka nagkadinang daog, sumadahon ang 3 ug 6 dili ba nuybe?
* * *
Sa katapusan natong lindog, naghisgut ta sa gipadangat nga isyu ni Fr. Rey Talaugon. Nangatuna man gud ang amahan sa SANCASE Developmental Training Pool nganong commercial rule kon straight eight ang gigamit nga format sa CESAFI lawn tennis event.
Human gitawag nako ang iyang atensiyon, nakadawat ko og tawag ni coach Fritz Tabura, ang tournament manager sa CESAFI lawn tennis. Gipasabot ni coach Fritz nga way bag-o sa paggamit og straight eight rule kay mao na man kini naandan sa CESAFI.
Midugang si coach Fritz nga sa bisan asa pang torneyo sa lawn tennis sama sa Milo Little Olympics, PRISAA ug Palarong Pambansa, straight eight man ang gigamit nga format sa torneyo. Hinaut nga pinaagi niini, nahatagan nato og katin-awan ang pangutana ni Fr. Rey.
* * *
Hi! diay ngadto sa akong mga tagilungsod sa Madridejos isla sa Bantayan nga sila si Rowenna Tayo ug Aira Mae Ilustrisimo. Nalipay lang ko nga nasayod nga kinaham diay nilang basahon ang Banat News. Batasana na kana ha. Pulos sila nagtungha sa kursong Bachelor of Science in Commerce sa managlahing tunghaan. Timan-i sa kanunay nga ang edukasyon maoy atong bahandi nga dili ma-ilog sa uban ug mao kini ang yawi alang sa maayong ugma.
* * *
Alang sa inyong mga reaksiyon, mahimong mo-email sa mannix_80@yahoo.com