Damgo sa Talisay

CEBU - Nakadawat ko og tawag dili pa dugay gikan ni Rev. Fr. Rey Talaugon, ang kura paroko sa Our Lady of Sacred Heart Parish (Capitol Parish) diha sa dalan Escario. Gawas nga nangimbitar sa umaabot niyang birthday, dunay mahinungdanong tuyo nako si Fr. Rey, ang pagpadangat sa iyang panahom ug sentimento sa nahitabo sa bag-o pa lang natapos nga lawn tennis event sa CESAFI.

Si Fr. Rey maoy amahan sa San Carlos Seminary (SANCASE) Developmental Training Pool. Wala man gud kasabot si Fr. Rey sa lohika nganong commercial rule ang gigamit sa torneyo nga amateur man unta ang CESAFI. Sa commercial, usa ra ka set ug race to eight, samtang sa amateur three sets, best of two. Buot ipaambit ni Fr. Rey mao nga sa amateur rule, mahatagan og tsansa ang usa ka atleta nga makabawi ug makita ang klaro niyang potensiyal ug stamina.

Duna man guy higayon nga sa bisan unsang matang sa duwa, dili maayo ang abilidad nga gipakita sa atleta sa sinugdanan. Kun commercial rule ang gamiton sa tennis, dili na siya makabawi pa kay wala na may ikaduhang set. Awtomatik siyang pilde. Apan kun amateur rule ang gamiton, kun mapilde ang usa ka atleta sa unang set, duna pa siya'y higayon nga makabawi.

Misuway ko og kuha sa habig ni CESAFI tennis director Fritz Tabura apan wala siya motubag sa duha nako ka mensahe pinaagi sa text. Ambot unsa kaha iyang rason nga nagpaila na man tawon ko nga trabahante ko sa Banat News. Huwaton nako imong tubag coach Fritz kay hangtod nga dili ka motubag ug klarohon kining maong isyu nga gipadangat ni Fr. Rey, ma-starring ka kanunay dinhi sa akong lindog.

* * *

Niadtong Biyernes, nakasuroy ta og balik sa Talisay aron pagkober lagi sa labing unang kaluha nga WBO regional championship sa maong dakbayan. Tayming kaayo nga ang akong lingkoranan tupad sa atong higala nga taud-taud na sab natong wala igkita, ang maabtik nga konsehal sa Talisay nga si Rodolfo 'Rodi' Cabigas.

Sa hamubo namong panagsulti, nasurprisa ko sa gibutyag nato ni Konsehal Rodcabs. Ang boxing ring nga gigamit sa promosyon ilaha man diay kadto sa dakbayan pinaagi sa Talisay City Sports Commission diin siya maoy pangulo.

Ug dili lang kay kana ra, gipahibawo diri nato ni Konsehal Rodcabs nga kumpleto sab sila sa mga ekipo sa boksing. Tuyo man gud nila nga ning sayo pa, mahashas ug mabaid na ang abilidad sa mga batan-ong Talisaynon nga nangambisyon mag-boksingero.

Matud pa ni Konsehal Rodcabs nga ilang gidamgo nga sa umaabot makamugna sila og usa ka world champion gikan sa ilang dapit. Sa kasaysayan man gud upat na ka world champion ang nagagikan sa Talisay apil na niini si Frank Cedeño. Kun ila kining nahimo sa una, way rason nganong dili nila mabuhat kini karon ilabi na kay aktibo ug suportado kaayo sa kagamhanan ang boksing.

Sulondon ug dalaygon kaayo kining proyekto sa Talisay nga gipasiugdahan ni Konsehal Rodcabs ug segurado ako nga usa kini ka inspirasyon ngadto ni bisan kinsa nga determinadong mosunod sa tunob ni Manny Pacquiao.

* * *

Alang sa inyong mga reaksiyon, mahimong mo-email sa [email protected]   (BANAT NEWS)