3-0 sweep tuyo sa Lancers

CEBU – Sa 2-0 nga abante nga ilang gihuptan, daw sa dili na kapugngan nga tiwason na karong gabii sa seven-time champion University of the Visayas (UV) Green Lancers aron sakmiton ang ika-walo nilang korona sa Cebu Schools Athletic Foundation, Inc. (CESAFI) sa Game 3 sa best-of-five championship series batok sa nagtinga na nga University of San Jose Recoletos (USJ-R) Jaguars diin gipaabot na ang ilang pagpanamilit sa walo nila ka beterano nga gikatakdang saksihan na usab og laing bagang duot sa katawhan nga magpunsisok daw sardinas diha sa Cebu Coliseum.

Ang Game 3 karong adlawa tali sa UV ug USJ-R ingon man usab sa juniors finals, pagakoberan sa Solar TV ug ipasalida pinaagi sa usa ka delayed telecast ugmang adlawa gikan sa 5 pm ngadto sa 7 pm.

Kung pakyas gihapon ang Jaguars, walo sa ilang senior players ang maghinan-aw na lang unya atol sa pagsaulog sa Lancers sa ilang ika-walo nga korona sa CESAFI. Mao kini ang ika-upat nga panagbagat sa Jaguars ug Lancers sa finals diin nahitabo kaniadto pang 2002 hangtod 2004 ug ang Lancers mao kanunay ang midaug sa korona.

Gawas lang og aduna pa’y laing alas o di ba hinuon dos diamong nga mahulbot ni coach Edito Salacut sa Jaguars, mahimong ila pang masanta ang pagsaulog sa Lancers karong gabhiona apan kung wala na, mobalik na sab sila sugod sa uno sunod tuig sa laing kampanya sa maidlas kaayong kampiyonato.

Ang six-eleven center nga si Gregory Slaughter naghinam-hinam na sab nga modawat sa iyang ikatulo nga MVP award karong gabhiona aron idugang sa unang duha niya ka MVP’s nga mao ang Finals MVP ug tungod kay siya man usab ang CESAFI All-Star MVP.

Kung ipasikad sa nangaging duha ka duwa diin nagpakita sa iyang katakos si Slaughter, wala’y bisan gamay nga pagduda kung ma-sweep ba sa Lancers ang series karong gabhiona ilabi na kay wala’y bisan usa sa habig sa Jaguars nga makapugong kaniya sa iyang pagmangtas sa undergoal.

Usa na lang ka milagro ang gilauman sa Jaguars ug kini ang pagbuto sa ilang commercial veteran nga si Luther Justiniani diin wala pa gyud maka-pruyba sa iyang kaugalingon nga makahimo siya pagdala sa team tungod sa kagamay sa iyang natampo nga opensa ug hasta usab sa iyang depensa.

Sa duha ka duwa diin sila napilde, ang Jaguars daku unta’g kahigayonan nga modaug apan dili lang gyud nila mapugngan si Slaughter. Si Justiniani igo lang usab nakamaneho og 11 puntos sulod sa duha ka duwa.

Sa Game 1, si Justiniani igo lang mi-iskor og upat ka puntos gikan sa free throw ug sa Game 2 naka-iskor siya og pito ka puntos apan dili igo nga makabaswat sa Jaguars ngadto sa gimithing kadaugan. Bisan pa man tuod nga dili gyud madala ni Justiniani pas-anon ang tibuok Jaguars, gikinahanglan usab nga adunay ikatampo ang uban pa niyang teammates ilabina ang mga seniors nga sila si Lyndon Gudez, Ranulfo Malinao, Randy Pogoy, Mannie Gabas, Armand Ponce, Jabe Delfino ug Edmar Pateño.

Wala pa hitultoli ni Justiniani ang lungag sa ring kay sa Game 2, 0 of 13 ang iyang field goal shooting ug 0 of 8 sa iyang three point attempts nga dili maoy buot sa Jaguars nga maoy mahitabo.

Si Slaughter kanunay sab makadawat og tabang kanila ni Bonifer Sendrijas ug Edrian Lao nga maayo sab ang gikapita sa series samtang sila si Von Harry Lanete, Ritchum Dennison, Chris Victor Diputado ug rookie guard nga si Harold Cincoflores maayo sab ang gipakitang katakos.

Sa laing bahin, ilogan karon sa juniors defending champion UV Baby Lancers ug sa University of Cebu (UC) Junior Webmasters kung kinsa’y makakuha’g 2-1 nga abante sa ilang kaugalingon nga best-of-five series alang sa korona sa junors division.

Tungod kay aduna may Game 4 sa juniors finals, isingit sab ang third place battle tali sa University of San Carlos (USC) Warriors ug UC Webmasters alang sa third place sa collegiate division unya sa Miyerkules. – BANAT NEWS