Sabal, Tolentino kampiyon sa 2nd Friendship Run

CEBU – Nangharus sila si Cresenciano Sabal ug Ailene Tolentino sa tagsa-tagsa nila ka dibisyon sa gipahigayon nga 2nd Friendship Run kagahapon sa buntag didto sa Sumilon Road, Cebu Business Park. Ang garbo sa De la Salle University (DLSU) nga si Sabal mitapos sa lumba sa oras nga 31:38.956 aron pangulohan ang 10k Mens Division, nagsunod kaniya ang kampiyon sa miaging Don Sergio Osmeña Fun Run nga si Elmer Bartolo nga mipahiluna sa ikaduhang dapit sa oras nga 32:37.860, samtang si Riez Enriquez nga aduna’y oras nga 33:45.618 maoy third placer ug ang garbo sa University of Southern Philippines (USPF) Eugene Delposo mipahiluna sa ika-upat nga pwesto sa oras nga 34:23.671.

Gikoronahan usab isip reyna sa 10k Womens Division si Tolentino human niya gitapos ang lumba sa oras nga 39:37.013, gisundan siya sa fourth placer sa Mt. Kinabalu Climbathon Liezl Gitaruelas sa oras nga 40:11.159, samtang ang kampiyon sa miaging Milo Marathon nga si Madelyn Carter maoy mipahiluna sa ikatulong dapit sa oras nga 41:37.230.

Si Noel Espina maoy nag-una sa 10k Masters A, nagsunod kaniya sila si Tomas Nuñez Jr. ug Jesie Misa nga mipahiluna sa ikaduha ug ikatulong dapit. Samtang si Ruth Banzon maoy nangharus sa 10k Masters B uban sa iyang mga runner-up’s nga sila si Marcos Pelare ug Jun Taneo.

Wala usab magpa-ulahi ang mga karerista sa 5k Division, si John Philip Dueñas maoy nahimong hari sa Mens Division nga gisundan nila ni Lopez Mendel ug Joel Delposo, samtang sa Womens Division si Mary Jane Beboso maoy misakmit sa first place, nagsunod kaniya sila si Joyry Lee ug Merlita Arias nga mipahiluna sa ikaduha ug ikatulong pwesto. – BANAT NEWS