Rambol na sa Talisay City

CEBU - Mokulit na og kasaysayan ang dakbayan sa Talisay dihang mo-host kini sa labing unang higayon og double WBO regional championship nga giulohan og “Talisay Fight Night”   karong alas-7:00 sa gabii didto sa Talisay City Sports and Cultural Center.

Ang walay pildeng KO artist nga si Anthony ‘Rocky’ Marcial moharong ni Thai Thongthai Rajanondh sa 12 ka hugna nga interim WBO Oriental super featherweight title sa main event sa maong boxing card nga gipasiugdahan ni international promoter Sammy ‘Don King’ Gello-ani sa SGG Sports Promotions uban sa Golden Dream Promotions, Viva Sports, Tanduay, Omega ug sa Talisay City Amateur Boxing Association (TACABA).

Si Marcial, kinsa mas daku ug mas taas itandi sa bisitang Thai boxer, mipakamang sa walo sa siyam niya ka mga biktima, lima niini taman lang sa unang hugna.

 Sa iyang bahin, ang 20-anyos nga si Rajanondh nagbitbit og 17-8 uban ang 4KOs.

Sa supporting main event, si Jonreil Casimiro naglaraw nga mamahimong unang boksidor gikan sa Omega Boxing Gym sa International Pharmaceuticals Inc. (IPI) nga modaog og titulo dihang mohamag kini sa laing Thai boxer nga si Liempetch Sor Veerapol alang sa bakanteng WBO Asia Pacific junior flyweight crown.

Si Casimiro wala sab makatilaw og pilde sa 10 ka away diin lima sa iyang nakontra iyang gipatikangkang. Si Veerapol dili sab masayon-sayon kay aduna sab kini ikapanghambog nga baraha nga adunay 10 ka daog diin pito niini pinaagi sa knockout ug tulo ang pilde.

Mokompleto sa baraha   mao sila si Rey Labao sa Las Vegas-based Dante Ortiz Stable vs. Darryl Pucdol sa Rex 'Wakee' Salud Stable, South Korean flyweight prospect Jonghwa Lee (7-0-1, 1KO) sa SGG Stable vs. Erwin Pulvera, junior flyweight Jheter Oliva sa General Santos City vs. Jerome Buntog, ug super bantamweight Richie Abapo sa Talisay City vs. Brian Inihaw. Ang mga tiket nagkantidad og P200. Katunga sa makita sa maong boxing promotion idonar ngadto sa Sta. Teresa de Avila Parish.  (THE FREEMAN)