Marcial, Rajanondh nag-abot

CEBU - Ang wala pay pildeng knockout artist nga si Anthony 'Rocky' Marcial ug ang kontra niining si Thonghai Rajanondh sa Thailand kalmado ug walay   kisaw sa una nilang paghimamat, apan ang duha mibahad nga ang ila na lang mga kumo maoy ilang pasultion sa ilang engkuwentro alang sa interim WBO Oriental super featherweight title nga maoy main event sa "Talisay Fight Night" ugma sa Talisay City Sports and Cultural Complex.

"Hindi ko masabi kung ma-knockout ko siya. Seguro mangyari yun," matud pa ni Marcial atol sa press conference kagahapon sa Golden Gisangag Express sa dalan Andres Abellana sa Brgy. Capitol Site, ning dakbayan. "Let's just see what happens in the ring," tubag pa sa interpreter ug trainer ni Rajanondh.

Si Marcial gihulip lamang ni reigning champion Ciso 'Kid Terrible' Morales, kinsa napugos og atras sa away gumikan kay na-injured ang tuo niining kamot samtang nag-training. Apan wala mabalaka si Marcial gumikan kay kanunay man siyang nag-ensayo bisan og walay naka-iskedyul nga away.

"Wala problema sa akin dahil palagi naman akong nag-ensayo," dason pa ni Marcial, kinsa mipakamang sa walo sa siyam niya ka mga biktima lima niini sa unang hugna.

Sa iyang bahin, ang 20-anyos nga si Rajanondh nagtangag og record nga 17-8 uban ang 4KOs.

Sa supporting main event sa maong eksplosibong promosyon nga gipasiugdahan ni international promoter Sammy Gello-ani sa SGG Sports Promotions inabagan sa Golden Dream Promotions, Viva Sports, Tanduay, Omega ug Talisay City Amateur Boxing Association (TACABA) ubos sa pagpangu ni Resty Seville, si Jonreil Casimiro sa Omega Boxing Gym makighamag ni Thai Liempetch Sor Veerapol alang sa bakanteng WBO Asia Pacific junior flyweight title.

Sama ni Marcial, si Casimiro wala say pilde sa 10 ka away diin lima sa iyang nakontra iyang gipatikangkang. Si Veerapol mokatkat sa ring bitbit ang baraha nga 10-3, pito niini pinaagi sa knockout.

Lain pang mga parisan nga magbinukbukay mao sila si Rey Labao sa Las Vegas-based Dante Ortiz Stable vs. Darryl Pucdol sa Rex 'Wakee' Salud Stable, South Korean flyweight prospect Jonghwa Lee (7-0-1, 1KO) sa SGG Stable vs. Erwin Pulvera, junior flyweight Jheter Oliva sa General Santos City vs. Jerome Buntog, ug super bantamweight Richie Abapo sa Talisay City vs. Brian Inihaw.

Ang maong kulbahinam nga kalihukan sugdan sa alas 7:00 sa gabii, apan ablihan na ang gate sa alas 5:00 sa hapon gumikan kay aduna pa may mga amateur bouts nga ipahigayon.

Ang mga tiket nagkantidad lang og P200. – BANAT NEWS