Plansado na ang dakung boxing event sa Talisay

CEBU - Plansado na ang tanan alang sa labing dakung boxing event sa dakbayan sa Talisay diin ilogan ang duha ka korona karong Biyernes didto sa Talisay City Sports and Cultural Complex.

Sugdan ang kumbati sa alas-7:00 sa gabii.

Ang fight card gipasiugdahan ni promoter Sammy Gello-ani sa SGG Sports Promotions sa abag sa Golden Dream Promotions, Viva Sports, Tanduay, Omega ug sa Talisay City Amateur Boxing Association (TACABA).

Si Ciso ‘Kid Terrible’ Morales, kinsa modepensa unta sa iyang titulo batok ni Thong Thai Rajanondh, nakaangkon og injury sa iyang tuong kamot samtang nag-ensayo alang ning maong awaya.

Si Gello-ani alisto hinuon nga nakakita og laing boksidor nga iparang sa bisitang si Rajanondh.

Gikuha ni Gello-ani ang walay pildeng si Anthony ‘Rocky’ Marcial, kinsa mi-iskor og makalisang nga eight knockouts alang sa iyang ikasiyam nga kadaugan.

Si Marcial ug Rajanondh magsangka alang sa World Boxing Oriental (WBO) super featherweight interim title.

Gipaabot nga mopakita’g maayong away sa double championship card mao ang walay pildeng si Onreil Casimiro sa Omega Boxing Gym, kinsa makigbinukbukay ni Liempetch Sor Veerapol sa Thailand alang sa bakanteng WBO Asia Pacific light flyweight crown.

Si Casimiro nagbitbit og 10-0, 5KOs, samtang si Veerapol adunay 10-3, 7KOs.

Lain pang away sa junior lightweights, si Rey Labao (16-1, 11KOs) sa Dante Ortiz Stable nga nagbase sa Las Vegas moharong ni Darryl Pucdol sa Rex ‘Wakee’ Salud Stable.

Mopakita sab sa iyang abilidad sa Talisay ang South Korean flyweight contender nga si Jonghwa Lee (7-0-1, 1KOs) batok ni Erwin Pulvera.

Sa iyang bahin, si junior flyweight Jheter Oliva sa General Santos moharong ni Jerome Buntog, samtang si super bantamweight prospect Richie Abapo sa Talisay City makigbinukbukay ni Brian Inihaw.

Ang press conference sa maong boxing card himuon karong alas-11:00 sa buntag diha sa Golden Gisangag Express sa dalan Andres Abellana, ning siyudad. Ang official weigh-in himuon ugma sa mao gihapon nga binyu. - BANAT NEWS