Astoria, New York Invitational Summer Tournament, Minglanilla mipilde sa Mandaue

CEBU - Si John-john Endrino mipabuto og 30 puntos aron pangulohan ang Team Minglanilla pagpukan sa Mandaue Bomb Squad, 97-90 ug ingon man pagsakmit sa kampiyonato sa Astoria, New York Invitational Summer Tournament niadtong Domingo didto sa Emcor Gym sa New York, USA.

Sa usa ka overseas call, ang coach sa Minglanilla nga si Dodong Endrino mibutyag nga sikit kaayo ang duwa gikan sa sinugdanan hangtod ngadto sa katapusang minuto, apan ang Minglanilla maoy nakakuha’g lucky breaks sa himalatyong oras.

 Ang Mandaue gipangulohan ni Drazen Ceniza sa iyang 15 puntos, miabag usab sa ilang 6-foot-5 nga sentro nga si Joel Capuno nga maoy nagmangtas sa rebounding department, apan dili igo ang iyang gihimo kay nagtusak-tusak man sab ang tirada sa Minglanilla.

Ang Winter League nga pagasalmotan sa mga kanhi PBA players nga karon atua na manimuyo sa nagkalain-laing dapit sa Amerika, mosunod dayon unya sa Oktubre 5 didto sa Boys and Girls Club gym didto gihapon sa Astoria.

Ang Johnny Air Cargo, usa ka international courier gikatahong mohatag og libreng round trip ticket gikan sa New York nganhi sa Philippines alang sa mapiling “best muse.”

 Sa laing bahin, si Endrino mipahibalo nga ang Minglanilla team gidapit sa pagduwa og duha ka adlaw nga exhibition games didto sa San Francisco, California karong Oktubre 18-19 diin ipahigayon sab ang All Ex-Lancer in America Reunion nga gitukod ni kanhi PBA star Alejo ‘Ponky’ Alolor.

Ang biyahe sa Minglanilla team ngadto sa Fresco, paluyohan ni ex-pro Estong Estrada nga lumad taga Minglanilla. - Gabby G. Malagar (BANAT NEWS)