CEBU - Ang power forward nga si Peter Cañete mipabuhagay sa iyang katapusang 13 puntos sa fourth quarter aron pangulohan ang University of Southern Philippines Foundation (USPF) Baby Panthers pagbuntog sa Cebu Institute of Technology (CIT) Wildkittens, 81-74 sa ilang bugno alang sa ikatulong dapit sa 8th Cebu Schools Athletic Foundation, Inc. (CESAFI) basketball event kagabii didto sa Cebu Coliseum.
Mga duwa ugma (Cebu Coliseum)
5:00 pm -- UV vs. UC
(championship -- Jrs.)
6:30 pm -- UV vs. USJ-R
(championship -- Srs.)
Ning pagsulat, ang no. 3 seed University of San Carlos (USC) Warriors ug fourth-ranked University of Cebu (UC) Webmasters padayon pa nga nagkumbati sa ilang kaugalingong “best-of-three” series alang sa ikatulong dapit sa collegiate division.
Si Cañete nga hapit na lang soloha ang tanang iskor sa fourth quarter mikudlit og 23 puntos alang sa Baby Panthers, kinsa nagkinahanglan na lang og usa ka daog aron mopahiluna sa ikatulo nga dapit. Sila si James Ferraren ug Anthony Aron miabuno og 15 puntos matag usa, samtang si Jason Batucan miabuno og 12 puntos.
Sa una nilang panagtagbo sa eliminasyon, ang Baby Panthers misungag sab sa Wildkittens, 89-83 nga gipangulohan gihapon nilang Cañete ug Ferraren.
Ang Baby Panthers maoy nikontrolar gikan sa pagsugod hangtod paghuman sa duwa. Nakuratan hinuon ang Baby Panthers dihang nailog sa Wildkittens ang labaw, 44-43 sa free throws ni Bridrick Brigoli gikan sa foul ni Marvin Demana kinsa gitawgan og technical foul sa nahabiling 3:30 sa third quarter. Si Jeffrey Taghoy miposa og usa sa iyang duha ka free throws aron pagposte og 45-43 nga bentaha ug dayon si Brigoli mipasulod sa iyang bonus shot aron pag-inat sa labaw ngadto sa tres puntos, 46-43. Gitapos sa Wildkittens ang third quarter sa iskor nga 53-51, apan si Cañete nangulo sa makabungog nga rally sa nanghinapos nga bahin sa duwa aron pagpukan sa Wildkittens.
Si Taghoy kinsa nanginit sab sa fourth quarter maoy nangulo sa Wildkittens sa iyang 19 puntos, si Brigoli mibugha og 10 puntos. Ang masaarong rookie guard nga si Mark Jayven Tallo mitampo og 11 puntos, samtang sila si Kenneth Getalla ug Joseph Nalos mikawhat og 10 puntos matag usa. - BANAT NEWS