CEBU – Kapin sa usa ka libo ka runners ang subling magginukdanay sa ipahigayong 2nd Friendship Run karong Domingo diha sa Cebu Business Park.
Mayoriya sa mga partisipante naggikan sa co-presentor sa maong kalihukan -- ang Don Bosco Technology Center ug Cebu Institute of Technology.
Sa Don Bosco, kadaghanan sa ilang runners gikan sa high school department ug mga ginikanan kay kabahin man kini sa ilang kalihukan sa Physical Education (PE) ug sa PTA.
Sa laing bahin, ang MEPZ gilauman nga maoy labing daghang mga entrante gumikan kay aktibo man kini sa nagkalain-laing mga kalihukan sa natad sa lumba sa dagan.
Cash prizes, plaques, trophies, medals ug gift packs ang ihatag ngadto sa top performers.
Ang kita sa maong lumba nga gipasiugdahan sa Sports and Fitness Enthusiasts (SAFE) adto mapunta sa Kadasig Parents Association Incorporated, ang non-government organization nga rehistrado sa Securities and Exchange Commission (SEC).
Ang lumba gipaluyohan sab sa Julie’s Bakeshop, Heartvit, Omega Pain Killer, Casino Rubbing Alcohol, Bioderm Germicidal Soap, Yayoy’s Grill and Resto Bar, Nature’s Spring, Globe Telecom, M. Lhuillier Kwarta Padala, Sky Flakes, Workout Fitness Center, Magnolia, Purefoods, Laguna Garden Café, Dunkin Donuts, Coca-Cola, New Placenta sa Psalmstre, Cebu Parklane Hotel, Kulas ug ang Cebu Photography Cebu.
Niadtong interesado, mahimong magparehistro sa Philippine Sports Commission-VII office sa Cebu City Sports Center.
Ang registration fee nagkantidad og P150 libre na niini ang t-shirt. – BANAT NEWS