CTP dribblers nakaipsot sa Three-B
CEBU - Naka-ipsot ang CTP dribblers nga gipaluyohan sa Metro Cebu Uptown Jaycees ubos ni Reeve Jumawan batok sa Three-B ni Bebot Bucton, 102-99 sa Punta Princesa Sports Association (PPSA) Businesssmen’s Cup niadtong miaging gabii didto sa Don Vicente Sotto Memorial gym sa barangay Punta Princesa, ning siyudad.
Sila si Rodrigo Bruzon ug ex-pro Teroy Albarillo maoy nagluwas sa CTP pinaagi sa ilang krusyal nga tirada sa himalatyong segundos sa duwa.
Si Bruzon, kanhi sakop sa CIT Wildcat, mihagdaw og 19 puntos aron pangulohan ang CTP, samtang si Albarillo mi-iskor og 16 puntos. Si Lou Regidor, laing kanhi pro kinsa karon maoy assistant coach sa M. Lhuillier Kwarta Padala Jewelers ug si Jeremy Huang miamot og 15 puntos matag usa alang sa maong kadaugan.
Ang Three-B milabaw og singko puntos sa halftime, 50-45 luyo sa paningkamot nilang Reggie Licanda, Frankie Lastimoso ug Randel Roncal, apan wala kini makasustenir sa nanghinapos nga bahin sa duwa.
Si Roncal mibahog og 31 puntos alang sa pilderong Three-B, gisundan ni Licanda sa iyang 24 puntos ug si Lastimoso mitampo og 15 puntos.
PUNTOS MATAG USA
CTP (102) -- Bruzon 19, Albarillo 16, Regidor 15, Huang 15, Balangauan 10, Maraño 8, Hernandez 6, Mercado 6, Jumawan 5, Boniel 2
Three-B (99) -- Roncal 31, Licanda 24, Lastimoso 15, Aniñon 9, Pahamutang 8, Abarintos 6, Diola 2, Bucton 2, Baisac 2 (BANAT NEWS)
- Latest
- Trending
