Cebu Movers kampiyon sa GAA 9th Founder's Cup

CEBU - Milampos ang Cebu Movers System ni playing coach Dr. Boy Te pagkulit og kasaysayan isip bugtong team nga mi-rehistro og 10-0 nga baraha human gipilde ang G&S International, 70-68 aron paglangkat sa korona sa Guadalupe Athletic Association (GAA) 9th Founder’s Cup niadtong Domingo didto sa Guadalupe Sports Complex.

Gibati hinuon sila og grabeng kakulba kay sikit kaayo ang duwa diin igo lang kini milabaw og dos puntos paghuman sa regulasyon.

Suwerte ang nagpaluyo sa kadaugan sa Cebu Movers ilabi na kay wala mosulod ang katapusang lay-up ni Jumie Ararao sa nagkaupos nga segundos nga mao unta ang maghatod sa duwa ngadto sa overtime.

Tumang kalipay ang gibati ni coach Te gumikan kay ang maong kadaugan usa man ka grandslam sa iyang career isip playing coach.

“Happy ko karong tuiga kay naka-grandslam ko,” matud pa ni Te.

Si Te mao sab ang playing coach sa Tubil Bar sa torneyo sa Power Ball ug ingon man sa Cebu Lite Shipping sa torneyo sa 1st Vic Enterprises.  

Ang Cebu Movers kinsa maoy no 1. seed ug title favorite kanunay nga naggukod ug igo lang nakatilaw og uno punto nga labaw sa halftime, 33-32.

Ang Cebu Movers miposte sa ilang dakung labaw sa iskor nga 70-65 human sa free throws ni Edgar Labra sa katapusang 16.5 segundos sa final quarter.

Sa kalit lang, mitira si Greg Ladaran og krusyal nga three-pointer aron pagkitkit sa labaw,   68-70 sa nahabiling 10 segundos sa dili pa motingog ang buzzer.

Ang MVP nga si Vincent Reyes maoy nangu sa Movers sa iyang 17 puntos, samtang si Bebot Ancot adunay 11 puntos ug sila si Labra ug Bebot Alquisola pulos mikimada og 10 puntos.

Si Rex Miñoza maoy nangu sa G&S Intl. sa iyang 14 puntos ug si Ararao mitampo og 13 puntos, sila si Ladaran ug Jabines miamot og 12 puntos matag usa ug si team owner nga si Don Guillen mitampo og 11 puntos.

Sa unang duwa, ang AC Sports mipukan sa Team MELO sa iskor nga 99-93 aron pagsakmit sa ikatulong puwesto.

PUNTOS MATAG USA

Unang duwa:

AC Sports (99) -- Escuyos 26, Cortes 24, Ebo 15, Rances 15, Monternel 9, Bacalla 6, Baba 2, Lumanas 2

Team MELO (93) -- Ocampo 31, Gil 17, Armstrong 13, Barade 9, Mediano 8, Baclayon 6, Gelig 5, Mendoza 4

Ikaduhang duwa:

Cebu Movers (70) -- Reyes 17, Ancot 11, Alquisola 10, Labra 10, Suzara 5, Elizalde 5, Labating 4, Leyson 2, Posadas 2

G&S Intl. (68) -- Miñoza 14, Ararao 13, Jabines 12, Ladaran 12, Guillen 11, Matudan 3, Bacalla 2    (BANAT NEWS)