CEBU - Andam na ang tanan alang sa ipahigayong Operation Paltik II nga giulohan og “1st Congressional Cup” karong Septiyembre 27-28 didto sa Ramon H. Durano Sports Complex sa Danao City.
Napulo’g-duha ka koponan ang magtige alang sa dungog nga gipangulohan sa defending champion Mandaue Airsoft Group (MAG).
Laing contenders nga mosalmot mao ang Black Aces, CAST, Cobra, Deep Recon, Has H2O, LTD, OAC, RAS, SAT, SAAT ug Trident Knights.
Mapasigarbuhong misugilon si Edmund Pingkian sa MAG team nga andam na silang modepensa sa ilang titulo human nila gipalambo ang ilang mga talento sa nangaging mga weekends.
Miangkon hinuon si Pingkian nga ang pagdepensa sa ilang titulo dili sayon kay ang ubang mga teams nangandam og maayo niining maong gubat.
Ang misyon sa mga partisipanteng koponan ning duha ka adlaw nga kompetisyon mao ang pagkuha og balik sa missile ug dad-on kini ngadto sa mas luwas nga dapit. (BANAT NEWS)