Donaire gituboy isip Knockout of the Year

CEBU - Ang tinahod nga sports patron nga si Jonathan ‘Atan’ Guardo naghingapin sa pagdayeg sa iyang prized ward nga si IBF/IBO flyweight champion Nonito ‘The Filipino Flash’ Donaire Jr. kay mao man kini ang gipasidunggan isip “Knockout of the Year” sa World Boxing Hall of Fame niadtong miaging adlaw didto sa Hyatt Regency Century Hotel sa Los Angeles, California.

Ang prestihiyosong dungog gitugyan ngadto ni Donaire gumikan sa iyang pagpaundang sa ikalimang round sa kanhi way pildeng Australian KO artist nga si Vic ‘The Raging Bull’ Darchinyan aron paglangkat sa kaluhang IBF/IBO belts niadtong Hulyo 7, 2007 didto sa Harbour Yard Arena sa Bridgeport, Connecticut.

“As one of his supporters and biggest fans, I take pride for the award handed out by the World Boxing Hall of Fame to Donaire. He richly deserves it because his triumph over Darchinyan was really a stunner,” matud pa ni Guardo. “I always believe in the talent and potential of Donaire that is why from the very start we don’t have any doubts in backing up his career. I know he will go a long way.”

Si Guardo maoy presidente sa Uniherb Philippines, usa sa mga nag-unang health companies nga tiggama sa nabantog nga food supplements sama sa Arthro diin si Donaire adunay unom ka fight-contract isip ilang official endorser.

Lain pang food supplements nga giapod-apod sa Uniherb mao ang Kidneycare, Heartvit ug Diabet.

Ikaduha na kining higayon ni Donaire nga nakadawat sa maong award.

Niadtong Disyembre 23 sa miaging tuig, ang Fil-American nga boksidor nakadawat usab sa Ring Magazine’s “Knockout of the Year” ug “Upset of the Year" award.

Sa pagka karon, ang 26-anyos nga si Donaire (19-1, 12KOs) nangandam na alang sa iyang title defense batok ni South African champion Moruti Mthalane (22-1, 15KOs).

Ang Donaire-Mthalane title fight gikatakda karong Nobiyembre 1 didto sa Mandalay Bay Resort and Casino sa Las Vegas, Nevada.

Ikaduha na kini ni Donaire nga moaway sa Mandalay Bay. Ang una dihang nidaog kini pinaagi sa unanimous decision batok ni Oscar Andrade sa Mexico aron paglangkat sa NBAF super flyweight title niadtong Oktubre 7, 2006.

Sa iyang unang pagdepensa sa korona, si Donaire mi-iskor og eight-round destruction sa Mehikanong si Luis Maldonado niadtong Disyembre 2 sa miaging tuig didto sa Foxwoods Casino sa Mashantucket, Connecticut.  (BANAT NEWS)