Matimco naka-ipsot
CEBU - Nakalahutay lang gihapon ang Matimco bisan pa sa kahigpit sa duwa aron pagposte og 73-72 nga kadaugan batok sa The Artisans sa Brgy. Ibabao sa open category sa Tabok basketball tournament sa Barangay Tabok Sports Complex sa dakbayan sa Mandaue.
Gikontrolar sa Artisans ang unang-duha ka kuwarter ug mirehistro sa ilang dakung labaw nga nuybe puntos, 23-14.
Sa second period, ang Matimco luyo sa paningkamot ni Arnaldo Ciabo nakakita’g buslot sa depensa sa Artisans hinungdan nakapatuyang kini og pasulod sa ilang mga puntos, 24-12 aron pag-angkon sa momentum sa halftime, 38-35.
Ang Matimco mao na ang nagdala sa duwa sa katapusang duha ka kuwarter. Hinuon, ang Artisans mihimo pa sa ilang katapusang rally aron pagsikit sa iskor, 70-71 sa daginutong segundos sa duwa.
Sa maong kadaugan, ang Matimco nakig-uban sa ilang biktima sa managsamang 3-1 win-loss records.
Si star pointguard Stalin Mirabueno mi-iskor lang og siyete puntos, apan wala kini igsapayan sa Matimco kay gitubos man kini nilang Flores ug Bondal.
Si Flores mibugha og 12 puntos alang sa Matimco, samtang si Aron milansang og 15 puntos aron pangulohan ang Artisans. (BANAT NEWS)
- Latest
- Trending
