CEBU - Lagmit mapahamtangan og silot ang forward sa Dallas Mavericks nga si Josh Howard kini human nigawas iyang video sa Youtube diin siya nakita nga nagbugal-bugal sa US National Anthem atol sa Charity Football Game nga gipasiugdahan sa laing NBA star nga si Allen Iverson niadtong Hulyo. Sa maong video, ang 28-anyos nga si Howard nagpunay'g yawyaw atol sa flag ceremony sa maong kalihukan nga iyang gitambungan.
“The Star Spangled Banner is going on. I dont celebrate this. I’m black,” bugalbugal ni Howard.
Dili kini ang unang kalapasan nga gibuhat sa 6-foot-5 cager. Kahinumduman, si Howard gisikop usab sa mga tinugyanan sa balaod sa susamang buwan dihang nasakpan kining nagamit og marijuana samtang niapil og usa ka drag race didto sa North Carolina.
Nagpabadlong usab siya atol sa Game-4 sa ilang playoff series batok New Orleans Hornets dihang iyang gisupak ang head coach niini nga si Avery Johnson nga dili mohimo og laing gimbuhaton. Apan wala mopatuo si Howard ug nagpunay hinuon kini'g apil og mga parties.
Ang first round draft pick sa Mavericks mo-average og 19.9 points, 7 rebounds, 2.2 assists sa miaging season. Tungod niini, si Howard gitanyagan aron moduwa sa U.S Olympic Team, apan iya kining gibasura.
Sa laing bahin, gisuspenso sab sa NBA ang 26-anyos ang beteranong forward sa Boston Celtics nga si Darius Miles og 10 ka duwa human nalambigit sa usa ka drug incident.
Si Miles mo-average og 10 points ug 5.2 rebounds sa iyang career. – (BANAT NEWS)