CEBU - Naangkon ni kanhi world champion Malcolm “Eagle Eye” Tuñacao ang bakanting titulo sa Philippine Bantamweight pinaagi sa split decision nga kadaugan batok ni Monico Laurente niadtong Sabado sa gabii sa gipahigayong Summer Boxing Tour didto sa Mandaue Public Plaza, siyudad sa Mandaue.
Si Tuñacao kinsa mipakita’g kabangis sa iyang nataran miarangkada ug miangkon sa suporta nga gitunol sa iyang mga silingan ug kahigalaan.
Gipagawas gyud ni Tunacao ang tanan niyang abilidad. Gani ang wa niyang kumo nga gikatahong na-injury wala nahimong babag sa iyang kampanya tungod kay nabawi man kini sa iyang tuong kumo nga mikulata ni Laurente.
Ang tulo ka hurado mitahag kang Tuñacao sa iskor nga 115-112, 115-113 ug 113-114.
Hinuon, sud sa 12 ka rounds walay na knockdown atol sa away apan nakibhangan ang iskor ni Laurente atol sa 10 round sa aksidenting headbutt.
Si Tuñacao kinsa nakalabni na og world crown atol sa iyang 11th professional nga away og napukan ni Thai Pongsaklek Wonjongkam milampos sa iyang krusada ug nagtangag karon sa 22-2-3 win-loss-draw record samtang ang pambato sa Johnny Elorde stable sa Parañaque City nga si Laurente mihagba ngadto sa 7-3-0 nga rekord.
Ang Summer Boxing Tour gipasiugdahan sa ALA Promotions uban sa abag sa Summit Natural Drinking Water nga mopahigayon usab og torneyo sa Cagayan de Oro, Davao, Tagbilaran, Bacolod ug laing siyudad sa probinsya sa Sugbu. - Arnie P. Atuel (BANAT NEWS)