CESAFI volleyball event banatan na

CEBU - Mosugod na ang University of San Carlos (USC) ug University of San Jose-Recoletos (USJ-R) ang ilang kampanya sa pagpanalipod sa ilang tagsa-tagsa ka dibisyon dihang ang 8th Cebu Schools Athletic Foundation, Inc. (CESAFI) volleyball event moulbo karong adlawa diha sa USC main gym.

Ang USC Spiking Warriors ni coach Norvie Labuga nagtinguha og grandslam sa men's division, apan gipaabot nga maka-engkuwentro kini og lig-on nga kontra gikan sa University of Southern Philippines Foundation (USPF) Panthers ug USJ-R Jaguars.

Dugang hagit alang sa Warriors mao kun unsaon nila pagtapak ang gibakantihan nilang Edward Carlo Tecson, Mark Pepito ug Ruel Lato, kinsa natapos na ang ilang tuig sa pagduwa.

Bisan, masaligon gihapon si coach Labuga nga modaog.

“I have the feeling that we can get the title this year as long as my players will do their very best and will really aim to win. This is a challenge for us, but we will be satisfied with whatever we could get in this season,” matud pa ni Labuga.

Ang USC Warriors moharong sa Cebu Doctors' University (CDU) sa main game sa panghapon nga duwa.

Sa pikas bahin, ang USJ-R Lady Jaguars ni Cebu Hall of Famer coach Grace Antigua nagpanikad na sab nga modepensa sa ilang korona.

“Hopefully, we can still get the title this year as long as they will play to the best of their abilities and they will not be threatened by their opponents. I really want my team to win, but it will always depend on their performances. I advised them to have way of power to do their very best in all the matches,” matud ni Antigua.

Ang Lady Jaguars mohamag sa University of the Visayas alang sa katapusang duwa sa buntag.

Laing mga duwa sa buntag mao ang USC batok USPF ug Southwestern University (SWU) batok sa University of Cebu (UC)

Sa hapon, ang USPF moharong sa UC, samtang ang USJ-R makigsangka sa Cebu Institute of Technology (CIT). (BANAT NEWS)