Cebu Niños kampiyon na sa 2008 Smart-Liga Pilipinas
CEBU - Nakab-ot ang dakung pangandoy sa M. Lhuillier Kwarta Padala-Cebu Niños nga mokulit og kasaysayan pinaagi sa pagdominar sa labing unang season sa 2008 Smart-Liga Pilipinas Finals dihang ilang gipilde ang Harbour Centre-Taguig, 107-91 sa Game-3 kagabii didto sa C.P. Tinga gym sa Taguig.
Ang Niños kinsa nidominar sa unang duha ka duwa sa “best-of-five” final series miharos pinaagi sa ilang bangis nga kombinasyon sa outside shooting ug sa fast break plays.
"This is history, that's why the boys are really inspired," matud pa ni Cebu coach Raul ‘Yayoy’ Alcoseba, kansang team gipaabot nga kuninitan sa ilang sumosunod sa ilang pagbalik. "This is for the Cebu fans and the Señor Sto. Niño."
Matud pa ni Alcoseba nga ang Niños nalisang sa ikatulong kuwarter dihang ang Batang Global mipatuman og zone defense. Apan ang Niños nakahimo og mga kausaban aron pagwagtang sa mga kabalaka.
Si Ron Capati maoy nangulo sa Cebu sa iyang 17 puntos uban ang siyam ka rebounds.
Pulos nangigo og maayo ang duha ka teams, apan ang Niños maoy nidominar sa boards, 40-29, sa transition game nakakuha kini og 17 puntos batok sa Taguig nga adunay siyam.
Ang Taguig mikitkit sa ilang 15 puntos nga alkanse, 67-78 sa tunga-tungang bahin sa fourth quarter, apan sila si Danny Aying ug Stephen Padilla milansang og sunod-sunod nga triples aron pagpakgang sa dautang tinguha sa Batang Global.
Si Padilla miposa og duha ka three-point shots sa gihimo nilang 12-2 run diin ang Cebu milabaw og otso puntos sa first quarter.
Gawas ni Capati, laing lima ka magduduwa ang miposte og double figures alang sa Niños.
Si Aying mikimada og 16, sila si Padilla ug Rodriguez pulos adunay 13 puntos, si Bruce Dacia miamot og 11 puntos ug si Ian Saladaga mitampo og 10 puntos alang sa Niños nga gipaluyohan sa Rexona, Accel, Burlington, Molten, Metathione, Nature Spring, Pagcor Sports and Laptop Phoneshop.
PUNTOS MATAG USA
Cebu (107) - Capati 17, Aying 16, Padilla 13, Rodriguez 13, Dacia 11, Saladaga 10, Cavan 8, Tangkay 6, Ababon 5, Mepana 4, Enriquez 3, Berame 1
Taguig (91) – Rodriguez 21, Ortiguerra 16, Marquez 14, Gatumbato 9, Bautista 9, Matias 8, Aldave 6, Bombeo 3, Latoreno 3, Reguerra 2 (BANAT NEWS)
- Latest
- Trending
