CEBU - Nahibalik na dinhi sa Sugbu si Eskrima Grandmaster Ciriaco 'Cacoy' Cañete gikan sa iyang malampusong mga seminar sa nagkalain-laing mga dapit didto sa Estados Unidos.
Si Cañete nihimo og duha ka adlaw nga seminar didto sa San Jose City, California sa Los Angeles, sa Van Nuys sa amihanang bahin sa California ug didto sa Portland.
Matud pa ni Cañete nga "free-wheeling" ug "no holds-barred" ang mga sparring sessions nga iyang gihimo kay siya man ang nangunay og tudlo.
Katapusan niyang seminar sa wala pa siya mobalik sa Sugbu didto sa Honolulu, Hawaii niadtong Septiyembre 6.
Nipahigayon sab siya og mga seminars didto sa Fairfield sa San Francisco, Seattle, Washington, Miami, Florida, Pittsburg, Pennsylvania, Atlantic City, New Jersey ug Alburquerque sa Mexico.
Sa kasamtangan, si Cañete nangandam na alang sa tinuig nga piniliay sa Doce Pares World Eskrima Federation karong Disyembre.
Si Cañete maoy presidente sa maong kahugpongan sud na sa 30 ka tuig.
Ang Doce Pares natukod niadtong 1932. (BANAT)