CEBU - Usa na lang ka daog ang kab-oton sa M. Lhuillier-Cebu Niños aron ilang madagit ang labing unang korona sa Smart Liga Pilipinas National Championship ug mao kini ang bugtong tuyo sa ilang pagpanulong sa Taguig Batang Global sa Game-3 sa ilang “best-of-five” series didto sa C. P. Tinga Memorial Hall.
Ang duwa gikatakdang sugdan sa alas- 6:00 sa gabii diin ang Niños nakapabor sa serye, 2-0.
Ang Niños ni sports patron Michel Lhuillier ug coach Raul ‘Yayoy’ Alcoseba wala kaayo makasinati og kalisud batok sa Batang Global atol sa unang duha ka duwa diha sa Cebu Coliseum -- 98-78 ug 78-69.
Sa mubong kasaysayan sa Liga, wala pay team ang nakabangon gikan sa 0-2.
Hinuon si coach Alcoseba mipasidaan sa iyang mga batos nga dili kaayo pahinobrahan ang ilang pagsalig. Human ilang gilubong sa Game-1, ang Taguig nakahimo og adjustments sa Game-2 hinungdan nga ang Cebu wala kini malubo’g maayo.
Usa sa hinungdan niini mao ang pagka-injury sa ilang sentro ug MVP candidate nga si Marlon Basco atol sa first quarter. Si Basco wala pay segurong makaduwa karon.
Sila si Bruce Dacia, Ron Capati ug Mark Ababon mao unya ang motapak sa buslot sa pagkawala ni Basco aron maangkon ang daog.
Sa iyang bahin, si Taguig head coach Jude Roque nagtuo nga makabangon pa sila ilabi na nga ang duwa adto tigian sa ilang balwarte.
Ang labing dakung problema sa Batang Global mao ang kalit nga kabugnaw sa duwa sa ilang guards partikular na nilang Lou Gatumbato, Niño Marquez ug Boyet Bautista.
Ang tulo ka mga beterano napuhalan nilang Ababon, Woodrow Enriquez, Ronald Bucao ug Stephen Padilla sa Cebu.
Bugtong nisubang sa Taguig sa maong serye mao silang center Frederick Rodriguez ug forwards Jonathan Aldave ug Paul Reguera. (BANAT)