8th CESAFI semis sugdan karon

CEBU - Tinguha karon sa University of the Visayas (UV) Green Lancers nga maka-una batok sa University of San Carlos (USC) Warriors sa ilang best-of-three semifinals aron mahayagan ang ilang kampanya alang sa ikawalong korona sa Cebu Schools Athletic Foundation, Inc. (CESAFI) basketball event diha sa Cebu Coliseum.

MGA DUWA KARON

(Cebu Coliseum)

5:15 pm -- UV vs. USPF (Jrs.)

6:45 pm -- UV vs. USC (Srs.)

Sa dili pa ang Lancers-Warriors showdown, mag-abot pa ang defending champion UV Baby Lancers ug ang University of Southern Philippines Foundation (USPF) Baby Panthers alang sa ilang kaugalingong “best-of-three” semifinals sa secondary division.

Ang Green Lancers nagtinguha sab nga mobawos sa ilang 76-80 nga kapildihan gikan sa mga kamot sa Warriors niadtong Agosto 2. Apan ang labing importante mao nga makauna sa serye aron mabalhiboan ang ilang kaatbang.

Ubos ni coach Elmer ‘Boy’ Cabahug, ang Green Lancers wala pa gyud makatilaw og duha ka sunod-sunod nga pilde sa CESAFI season ug mao kini ang angayan hinuklogan sa Warriors.

Nagkanayon si Cabahug nga niadtong panahon nga napilde sila sa Warriors, napiangan ang Green Lancers kay wala makaduwa sila si Von Harry Lañete ug Ritchum Dennison.

Midugang si Cabahug nga ang ilang taas nga championship experience maoy usa nga naghatag kanila’g bentaha.

Sa laing bahin, si Warriors coach Jay Ramirez mihulagway nga usa sila ka underdog kay ang ilang star center nga si Enrico Llanto dili man makaduwa kay gihasol sa iyang “slipped disc.” Gani, ilang gihangyo si Llanto nga molingkod lang sa ilang bench aron paghatag og moral support.

Giangkon ni Ramirez nga maglisod sila’g buntog sa Lancers.

“Among ipakita nga ang Warriors mo-fight gyud up to the end aron malingaw ang mga tawo,” matud pa niya.”

Sa iyang bahin, si USC Warriors consultant Mike Reyes miangkon nga lisud pildihon ang Lancers, hinuon naghimo na kini og daghan kausaban sa iyang team alang sa ilang sangka sa Green Lancers. 

Bisa’g wala si Llanto, nanghinaut si Ramirez nga maayo ang ipakita sa iyang big men nga naglakip nilang Joven Cid Cortes, Edward Bakker, John Emel Rowe ug Robert Gines Codilla.

Makabentaha hinuon ang Green Lancers kay gawas nga kompleto ang line-up niini, anaa uban kanila ang 6-foot-11 Fil-Am nga si Gregory Slaughter. Anaa sab nila ang beteranong point guards sama nilang Von Harry Lanete, Ritchum Dennison ug Chris Victor Diputado.  (BANAT)