Panthers giihaw sa 5th Avenue

CEBU - Miugkat na sab og laing daog ang 5th Avenue Telecoms dihang ilang giihaw ang University of Southern Philippines Foundation (USPF) Baby Panthers, 88-71 sa nagpadayong 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Ang Telecoms ni coach Marvin Felicis mipabuhagay og mga puntos sa second quarter aron buk-on ang panagtabla, 17-all ug ingon man pag-angkon og nuybe puntos nga bentaha, 39-30 sa first half.

Misuway og gukod ang Baby Panthers, 52-58, apan ang Telecoms mipabuto og makabungog nga 30-19 nga bomba aron pag-abante og 17 puntos ug nagpabiling way pilde human sa duha ka duwa ning duha ka bulan nga torneyo nga gipasiugdahan sa M. Lhuillier Sports Development Foundation (MLSDF) pinaagi sa paningkamot sa ilang executive director ug multi-titled coach Eddie B. Ybañez.

Sa laing duwa, ang Philweb mibuntog sa University of the Visayas (UV)-Mandaue sa iskor nga 73-70.

Ang Philweb miposte sa ilang dakung labaw, 40-29, apan ang UV-Mandaue luyo sa paningkamot ni Jeremy Espina, mibawos aron pagpapas sa dakung labaw ug gani ila pa nga nailog ang labaw, 69-68 sa nahabiling 1:28 sa duwa. Si Espina mirehistro og tournament-high nga 35 puntos.

Sa sunod nga posisyon, si Labata miposa og crucial 3-pointer aron hatagan ang Philweb og dos puntos nga labaw, 71-69. Ang UV-Mandaue misuway na sab og sikit, 70-71, apan si Te yano kaayong mipasulod sa iyang duha ka free throws sa nahabiling 12 segundos sa duwa aron pagselyado sa kadaugan.

PUNTOS MATAG USA

Unang duwa:

5th Avenue Telecoms (88) - Marques 23, Cañete 15, Quilab 13, Agusto 10, Jacoma 8, Guardiario 8, Talingting 4, Solis 3, Mangin 2, Ababa 2

USPF (71) - Loberanes 27, Mica 10, Daan 8, Cabatingan 8, Unabia 7, Pogoy 6, Quilaton 5 

Ikaduhang duwa:

Philweb (73) - Lopez 19, Iway 16, Labata 15, Te 8, Baba 7, Alejo 4, Manaloto 4

UV-Mandaue (70) - Espina 35, Eumague 13, Casinillo 9, Abesia 5, Lacaba 2, Pitogo 2, Romarate 2, Pepito 2 (BANAT)