Cebu Niños miangkon sa Game-1

CEBU -  Ang M. Lhuillier Kwarta Padala-Cebu Niños walay kukaluoy nga milubong sa Harbour Centre-Taguig, 98-78 aron pag-angkon sa Game-1 sa “best-of-five” series sa Smart-Liga Pilipinas Finals kagabii didto sa Cebu Coliseum.

Naglaraw karon ang Niños, kinsa nakabaton og homecourt advantage sa series gipaluyohan sa Rexona, Accel, Burlington, Molten, Metathione, Nature’s Spring, Pagcor Sports ug Laptop Phoneshop nga magbawon og 2-0 nga bentaha sa dili pa kini mosulong didto sa C.P. Tinga gym alang sa Game-3 ug   Game-4 kun malugwayan pa ang serye.

Kun magtabla ang series, 2-2, ang Cebu maoy mo-host sa Game-5.

Hugot kaayo ang gipabuhagay nga duwa sa duha ka kampo diin nagtabla ang iskor paghuman sa unang 10 minutos sa kumbati, 26-all.

Ang Niños wala kaayo makalabaw og daku ug igo lang kini miabante og tres puntos, 49-46 sa first half.

Ang Niños pinaagi sa paningkamot nilang Jojo Tangkay ug Ian Saladaga milusad og 13-6 run pagsugod sa second half aron pag-angkon og 11 puntos nga bentaha, 62-51 sa tunga-tungang bahin sa third quarter nga nakapaluag sa ginhawa sa mga Sugbuanon. 

Ang Taguig sayong nakaangkon og bentaha pagsugod, 12-2 dihang sila si Marvin Ortiguerra ug Paul Reguerra miposa og 3-pointers matag usa nga nakapahilom sa mga dumadapig sa Niños.

Apan si Tangkay mipasud og walo ka sunod-sunod nga puntos, lakip na ang duha ka triples, samtang si Danny Aying milansang sa iyang 3-point aron pag-ilog sa labaw, 26-24.

Si Mark Ababon mihaling sa transition game sa Niños uban sa fast break nga naghatag sa Cebu sa ilang kinadak-ang labaw, 46-39 sa third quarter.

Pinaagi nilang Bombeo ug Erick Rodriguez, napahakan ang labaw sa Niños, 46-44 sa nahabiling 1:18 sa wala pa si Saladaga mougbok og 3-pointer.

Si Saladaga miposte og 12 puntos sa second quarter sa kinatibuk-an niyang 19 puntos, bisan pa ang upat sa iyang kaubanan mikulit og double figures. Si Ron Capati adunay 14 puntos, gisundan ni Woodrow Enriquez sa iyang 13 puntos, si Tangkay miamot og 12 puntos ug si Bruce Dacia mirehistro og 11 puntos.

Ang duha ka koponan pulos milubong og lima ka triples sa opening half diin ang Cebu maoy nakaangkon og higher percentage (5-of-10) batok sa Taguig (5-of-12). Hinuon, ang Taguig maayo sa shooting nga adunay 20-of-33, samtang ang Cebu adunay 17-of-34.

Ang Niños maoy nidominar sa board 20-11 ug daghan kini’g na-iskor sa fastbreaks 14-8, samtang ang Taguig daghan og assists 11-8 ug daghan sab kini og turnovers 7-5.

Ang Niños nakapahimulos sa ilang dakung labaw nga 24 puntos, 98-74 kortesiya sa sunod-sunod nga triples ni Jayford Rodriguez sa nahabiling 41 segundos sa duwa.

PUNTOS MATAG USA

Cebu (98) - Saladaga 19, Capati 14, Enriquez 13, Tangkay 12, Dacia 11, Basco 8, Rodriguez 6, Ababon 6, Bucao 6, Mepaña 6, Aying 3, Padilla 2, Cavan 2

Taguig (78) - Rodriguez 19, Reguera 15, Aldavae 13, Bombeo 8, Matias 8, Gatumbato 7, Ortiguerra 6, Marquez 2   (BANAT NEWS)