Cebu makig tigi sa Taguig karon

CEBU – Mahitabo na karong adlawa ang gikahinaman nga panagbangga tali sa host team nga Cebu Niños ug Taguig Batang Global sa game-1 sa ilang best-of-five finals series sa nagpadayung aksiyon sa Smart Liga Pilipinas National Finals karong alas 6:00 sa hapon didto sa Cebu Coliseum.

Ang Niños ni Michel Lhuillier ug Coach Yayoy Alcoseba mao ang mas gipaburan nga koponan itandi sa Batang Global ni Mayor Freddie Tinga ug Coach Jude Roque. Unang nag-abot ang duha ka koponan niadtong Hunyo 18, diin midaug ang Niños batok Batang Global 98-93 sa overtime, milabay ang tulo ka adlaw gi-usban sa Niños ang Batang Global, 117-94. Sa semifinals, gipukan sa top seed nga Niños ang fifth seed nga Lipa-Batangas Barakos samtang ang third seed nga Batang Global mipapha usab sa seventh seed nga Misamis Oriental Meteors.

Usa usab sa atangan sa Finals mao ang panag-abot sa duha ka top MVP contender nga sila si Marlon Basco sa Niños ug Ronnie Matias sa Batang Global. Si coach Alcoseba magsalig gihapon sa iyang mga sinaligang player nga sila si Basco, Bruce Dacia, Stephen Padilla ug Mark Ababon nga maoy mangulo sa opensa sa Niños. Samtang sa iyang bahin, si coach Roque sa Taguig motugyan sa maong duwa ngadto sa iyang mga keyplayer nga sila si Matias, Marvin Ortiguerra, Lou Gatumbato, Niño Marquez, Boyet Bautista, Jonathan Aldave, Jeff Bombeo ug Mel Latoreno nga maoy mubahug alang sa malisud nga tahas nga ilang sagubangon karong adlawa. – BANAT NEWS