Domingo milampos pagdepensa sa bakus

CEBU – Usa ka makusug nga right uppercut ang gipahagsa sa ALA boxer nga si Michael Domingo (37-14-2, 16 KOs) sa ilong sa Thai challenger nga si Ratanachai Sor Vorapin (73-11, 49 KOs), hinungdan sa pagkatumba niini sa ninth round aron madepensaan ang World Boxing Organization (WBO) Oriental bantamweight belt sa main event sa “Daytime Boxing: Philippines vs Thailand” kagahapon didto sa Cebu Coliseum. Ang 29-anyos nga garbo sa Libac, Sultan Kudarat mao ang nipatigbabaw sa ilang away bisan paman sa hugaw’ng duwa nga gipakita ni Vorapin ibabaw sa ring. Ang kanhi world champion nga si Vorapin nagpunay lang og panglayog ug pagpaniko ngadto kang Domingo aron sa pagguba sa duwa niini, apan wala kini musalir ni Domingo. Pag-abot sa nahibiling 2:58 sa ninth round usa ka right uppercut ang gibuhian ni Domingo nga mitugpa ug mibuak sa ilong ni Vorapin nga maoy hinungdan sa pagkatumba niini. Misuway og sukol ang nagkadugo nga Thai apan wala na kini tuguti ni Dr.Armindo Ceniza tungod sa ka grabe sa pagkabu-ak sa ilong niini.

“Maglisud ko og sud niya kay grabi kaayo ka hugaw moduwa. Maayo na lang gani dili kusog ang iyang suntok,” matud pa ni Domingo.

Sa laing bahin, ang presidente sa ALA Promotions nga si Michael P. Aldeguer nagplano nga i-apil si Domingo sa undercard sa Pacquiao-De la Hoya undercard karong umaabot nga Disyembre 5 didto sa US.

Sa supporting main event, nidaug pinaagi sa split decision ang lumad nga taga-Zamboanga nga si Joel de la Cruz batok sa iyang kaatbang nga si Somsak Kokietgym sa Thailand, si Julios Alcos mipatigbabaw batok ni Nelson Llanos via majority decision, Marvin Sonsona mipaluhod ni John Naimez sa first round, samtang ang female fighter gikan sa Thailand nga si Usanakorn mi-TKO ni Geremie Tabastabas sa third round sa ilang away. – BANAT NEWS