Korte mipabor kang Villafuerte

CEBU – Ang huwes sa Manila regional trial court mideklarar nga ang gihimong National Congress sa Samahang Basketbol ng Pilipinas (SBP) ubos ni business tycoon Manuel V. Pangilinan kaniadtong Hunyo 12, null and void ug sa samang paagi, ang mga opisyales nga napili niadtong ilang tigum, dili tinuoray ug wala’y ngipon nga angay mopatuman og balaud.

Sa iyang 21 ka pahina nga hukom, si Judge Antonio M. Eugenio, Jr. sa Manila RTC Branch 24 , mimando usab sa mga SBP officers sa paghunong ug dili na manghilabot sa mga kalihokan sa grupo ubos sa mga petitioners nga gipangulohan ni Kongresista Luis R. Villafuerte sa Camarines Sur.

Ang maong kaso nahilatid isip usa ka Civil Case no. 08-119546.

Si Judge Eugenio mi-aksiyon sa petition ni Villafuerte ngadto nila ni Misamis Oriental Governor Oscar Moreno ug mga kauban sa grupo isip mga sinumbong.

Kahinumdoman nga misuwat si Villafuerte ngadto kang Pangilinan kaniadtong Agosto 21, 2007 nga nangayo og katin-awan sa tino nga hinungdan kung nganong magdumili man siya pagtahud kang Villafuerte kinsa maoy natudlo ug napiling chairman sa SBP.

Nagsugod ang kagubot kaniadtong Agosto sa tuig 2006 dihang ang kanhi presidente sa BAP nga si Joey Lina ug ang presidente sa Pilipinas Basketball (PB) nga si Bernardo Gabriel Atienza mi-isyu og Tokyo Communique atol sa 18th FIBA Wold Congress didto sa Tokyo, Japan nagpabor sa paghiusa sa BAP ug PB alang sa kahusay sa basketbol sa Pilipinas

Ang panaghiusa maoy nakamugna sa usa lang ka basketball body nga nangayo’g sanction sa Philippine Olympic Committee ug maoy modumala sa BAP didto sa FIBA ubos sa pipila ka mga kundisyones.

Nahulma ang three-man panel ug si Pangilinan maoy nahimong ikatulo nga sakop ug natudlong tsirman sa maong panel.

Kaniadtong Septiyembre sa 2006, gitukod ni Pangilinan ang Samahang Basketbol ng Pilipinas (SBP) uban ang laing upat ka mga incorporators ug nianang pagka- Pebrero 4, 2007, ang 3-man panel nagkita didto sa Bangkok, Thailand aron pirmahan ang memorandum of agreement sa panaghiusa sa BAP ug PB ug ang mga sakop sa SBP pagadawaton isip mga “probationary” members.

Pagka sunod adlaw, Pebrero 5, 2007, gipahigayon ang Unity Congress didto sa Dusit Hotel sa Makati diin ang mga trustees sa SBP mitambong isip mga transitory members.

Kalabot sa Tokyo Communique, ang BAP may katungod sa pagtudlo ug chairman of the board of trustees ug sa treasurer samtang ang PB adunay katungod sa pagtudlo sa vice-chairman ug sa corporate secretary. Ang chairman ug treasurer nganlan atol sa Unity Congress ug nahitabo nga si Villafuerte maoy napiling chairman ug si Christian Tan maoy napiling treasurer.

Ang vice-chairman mao si Victorico Vargas ug ang corporate secretary mao si Marievic Añonuevo.

Apan human niadto, wala gihapon mo-ila ang grupo ni Pangilinan sa katungdanan nga gihuptan ni Villafuerte hinungdan nga siya ug si kanhi kongresista Prospero Pichay nga napili isip BAP-SBP president sa ilang kaugalingon nga piniliay kaniadtong Hunyo 4, nangayo og pakitabang sa korte kalabot niining maong panagsungi.

Sa maong hukom, ang korte nagkanayon nga ang congress nga gipatawag ni Añonuevo nga gitambongan lang og siyam sulod sa 87 ka sakop sa SBP, lisod tuho-an nga usa ka lehitimong pinili-ay. – BANAT NEWS