Pacquiao mo-anhi na sab sa Sugbu

CEBU - Mobisita na sab dinhi sa Sugbu si four-division world champion Manny 'Pacman' Pacquiao alang sa duha ka mahinungdanong katuyoan.

Una, mao ang pagtambong sa "Bahug-Bahug sa Pinamungajan" boxing card ug ikaduha mao ang pagpangulo sa blessing sa kapilya sa Barangay Punta Princesa diin siya maoy mibubo og pundo sa maong katukoran.

"I think it is one of the the nicest chapels in Cebu," matud pa sa sinaligan ni Pacquiao nga si Rex ‘Wakee’ Salud, kinsa nakatampo sab og dakung kantidad aron matukod ang maong kapilya. "Manny is a very religious person and he ordered the construction of the chapel to inspire people to always look up to God and thank Him for all what we have in life."

Ang kapilya dili kaayo layo sa nabaniog na kaayong RWS Gym sa Guadalupe Osmeña Village sa Brgy. Punta Princesa.

Si Salud nagkanayon nga si Pacquiao moabot sa Sugbu karong Sabado sa buntag ug molahos dayon kini sa blessing sa kapilya. Inig ka hapon, mogikan sila padung sa habagatang lungsod sa Pinamungajan aron mosaksi sa maong pinaksitay ibabaw sa ring nga gipasiugdahan sa MP Promotions ni Pacquiao inabagan sa RWS Promotions International ni Salud.

Ang kumbati magsugod sa alas-3 sa hapon.

Nagkanayon si Salud nga ang kagikan sa mga Pacquiao didto sa Pinamungajan ug maoy   hinungdan nga si Pacquiao naghinam-hinam nga motaak sa maong dapit sa labing unang higayon.

Sa Domingo sa gabii, si Pacquiao molarga padung sa Los Angeles diin siya magsugod sa hugtanon niyang pagbansay-bansay alang sa gikahinaman niyang superfight batok ni Oscar de la Hoya karong Disyembre 6 didto sa MGM Grand Hotel and Casino sa Las Vegas, Nevada.

Si Pacquiao gigarantiyahan nga mobulsa og dili momenos US$20 milyones sa iyang paghagit ni De la Hoya sa ilang engkuwentro nga gibansagan og "Fight of the Century."

Sila si Pacquiao ug De la Hoya mo-away ubos sa timbang nga 147 ka libras. Makabungog nga US$3 milyones ang ipahamtang nga multa sa bisan kinsa nilang duha ang mosubra og timbang atol sa opisyal nga weigh-in.

Sa laing bahin, sa main event sa karambola didto sa Pinamungajan, si Romart Sentillas sa Mandaue makighamag ni Rodel Tejares sa Bukidnon sa gikatakdang 10 ka hugna nga non-title bout.

Nagkompleto sa card mao ang away nilang Adonis Aguello vs. Romnick Rapista, Dave Christian Baliguat vs. Unjun Morano, Dizon Cag-ong vs. Octavio Aleonar, Ponce Villacura vs. Alex Baricuatro, ug Yame Bermiso vs Ricky Nuñez.