CEBU - Miposte sa ilang ikaduhang sunod-sunod nga daog ang MLSDF Selection pinaagi sa pagpukan sa Philweb, 62-55 sa nagpadayong 6th M. Lhuillier Kwarta Padala Under-21 Developmental Basketball League didto sa Consolacion Sports Complex.
Ang MLSDF mipahungaw dayon sa ilang kainit sa pagsugod sa duwa diin mi-iskor kini sa unang 10 puntos sa duwa aron pag-angkon og nuybe puntos nga labaw, 20-11 human sa first quarter.
Ang Philweb nga gibitoonan sa aspiring hoopsters gikan sa University of San Carlos misikit sa iskor, 28-31 sa halftime, apan ang MLSDF Selection mipatuman sa ilang game-plan uban sa ilang kaigmat ug kaabtik sa ikatulong kuwarter aron pag-inat og balik sa ilang labaw, 50-37 paingon na sa katapusang kuwarter.
Bisan pa niini, wala gihapon mahubsi sa paglaum ang Philweb ug mi-rally kini aron pagtabla sa iskor, 55-all sa katapusang dos minutos sa duwa. Apan giluwas kini ni Oteda pinaagi sa paglansang og sunod-sunod nga field goals aron hatagan ang MLSDF og kuwatro puntos nga labaw, 56-52.
Ang kampiyon ning maong torneyo nga gitukod sa M. Lhuillier Sports Development Foundation (MLSDF) pinaagi sa paningkamot sa ilang maabtikong executive director Eddie B. Ybañez makadawat og P5,000, samtang ang second placer makaangkon og P3,000 ug ang third placer mobulsa og P2,000.
PUNTOS MATAG USA
MLSDF (62) – Dabuco 15, Cabahug 11, Bucayan 6, Villanil 6, Ferraren 6, Panerio 5, Oteda 4, Sebial 4, Basco 3, Tabalin 2
Philweb (55) – Ang 17, Povadora 11, Labata 7, Iway 6, Te 5, Baba 5, Manaloto 3, Saceda 1