Cebu Niños sud na sa Liga Pilipinas finals

CEBU - Gibira sa top seed M. Lhuillier-Cebu Niños ang unang luna sa kampiyonato sa Smart Liga Pilipinas National Playoffs pinaagi sa pagpalagpot sa fifth seed Lipa-Batangas Barakos, 96-89 atol sa ilang pagpanulong didto sa Lipa City Youth and Cultural Center niadtong Lunes sa gabii.

Gitapos sa Cebu Niños “best-of-five” series bitbit ang 3-1 nga baraha.

Ang multi-titled Cebu Niños ni Michel Lhuillier ug coach Raul ‘Yayoy’ Alcoseba magpaabot na lang sa modaog tali sa Taguig Batang Global ug sa Misamis Oriental Meteors alang sa finals.

Ang Taguig ug Misamis kasamtangan karon nga nagtabla sa serye, 1-1.

Ang Game-3 ug Game-4 duwaon karong gabii ug ugma didto sa Xavier University Gym sa Cagayan de Oro City. Ang Game-5 kun kinahanglanon, motabok sa Taguig City karong Septiyembre 13.

Ang Cebu Niños milabaw og 10 puntos sa nahabiling 1:31 sa duwa, 92-82, apan si Al Vergara milansang og triple, gisundan og laing dos puntos gikan ni Jay-Arr Estrada aron pagkitkit sa labaw, 87-82. Hinuon, wala mahulga ang Cebu Niños kay si Mark Ababon miposa og puntos aron pagselyado sa kadaugan.

Si Bruce Dacia maoy topscorer sa Cebu Niños sa iyang 18 puntos, samtang si Ababon mihirit og 17 puntos. Si Ron Capati midiga og 15 puntos uban ang 10 rebounds, samtang si Basco misansan og 11 puntos ug 11 usab ka rebounds.

Ang naparot nga Barakos gipangulohan ni Bonbon Custodio pinaagi sa iyang 21 puntos. Si Vergara mipupo og 14 puntos uban ang pito ka assists, gisundan nilang Jeff Sanders, Don Camaso ug Ismael Junio nga milansang og 12 puntos matag usa.

Ang Cebu Niños maoy mo-host sa Game-1 ug Game-2 sa Smart Liga Pilipinas National Finals karong Septiyembre 15 ug 16 diha sa Cebu Coliseum.

Ang Game-3 ug kun kinahanglan ang Game-4 mobalhin sa balwarte sa kontra. Kun magtabla ang serye, ang Game-5 mobalik dinhi sa Sugbu sa Septiyembre 21.

PUNTOS MATAG USA

Cebu (96) – Dacia 18, Ababon 17, Capati 15, Basco 11, Saladaga 10, Padilla 10, Mepana 8, Enriquez 4, Aying 3

Lipa-Batangas (89) – Custodio 21, Vergara 14, Sanders 12, Camaso 12, Junio 12, Estrada 9, Lim 5, de Castro 2, Moody 2