UC, USC nakasulod na sa semis

CEBU - Hingpit na nga nakasulod sa semifinal round ang University of Cebu (UC) Webmasters pinaagi sa pagposte og 76-73 nga kadaugan batok sa Southwestern University (SWU) Cobras sa 8th Cebu Schools Athletic Foundation, Inc. (CESAFI) basketball event kagabii didto sa Cebu Coliseum.

Si Kevin Quilantang mibagdok sa iyang 3-point shot sa katapusang 38.4 segundos, samtang ang 6-foot-9 nga si Jun Mar Fajardo namugas sa iyang duha ka free throws aron giyahan ang ilang koponan ngadto sa kadaugan.

Sa sayo pa, ang University of San Carlos (USC) Warriors, nakaangkon sab og lingkoranan sa semifinals dihang ilang giihaw ang Don Bosco Technology Center (DBTC) Greywolves, 85-63.

Sa labing unang higayon, ang USC mirehistro og duha ka daog dihang ang ilang igsuong Baby Warriors mibuntog sa third-seed University of Southern Philippines Foundation (USPF) Baby Panthers, 64-58 aron pagpuwersa nga tinaktakay nga playoff ugma.

Ang Baby Warriors mao lang ang bugtong nakasugakod sa quarterfinals kay miabante na man ang tanang seeded teams lakip na ang Cebu Institute of Technology (CIT) Wildkittens, kinsa nimasaker sa University of San Jose-Recoletos (USJ-R) Baby Jaguars, 94-63.

Gidominar sa Webmasters ang unang duha ka kuwarter, apan naapsan ug nabiyaan kini og nuybe puntos sa nanghinapos nga bahin sa third quarter dihang nangatol ang mga kamot nilang Alfred Belande ug Ard Diango. Hinuon, nailog sab dayon og balik sa Webmasters ang labaw human kini milusad og 13-2 run, 59-57 sa dayong sugod sa final quarter.

Bisan pa niini, ang Cobras nakamaneho pa pag-ilog sa labaw, 70-69 human sa lay-up ni Belande sa nahabiling 1:06 sa duwa.

Sa return play, si Quilantang mitira og triple ug dayon si Fajardo mipasulod sa iyang duha ka free throws aron hatagan ang UC og 74-70 nga bentaha sa nahabiling 7.8 segundos sa regulasyon.

Si Fajardo maoy nangulo sa UC sa iyang 22 puntos uban sab ang 12 ka rebounds ug pito ka blocks, samtang si Janssen Abella mitusak og duha ka triples sa iyang 17 puntos. Sila si Quilantang ug Edward Pao miamot og 11 puntos matag usa.

Ang Cobras gipangulohan sab ni Belande sa iyang 25 puntos, samtang si Diango miabuno og 13 puntos.

Sa sayo pa, si Joven Cid Cortes miugkat og 15 puntos aron pangulohan ang Warriors, samtang si Rudy Enterina Jr., ang bugtong naka-iskor og double figures maoy nangulo sa Greywolves sa iyang 11 puntos.

PUNTOS MATAG USA

Srs.

USC (85)——— Cortes 15, Bautista12, Rowe 10, Bakker 10, Cantonao 7, Hermosa 7, Padillo 6, Igao 5, Gallarde 4, Bercede 4, Joven 2, Codilla2, Blanes 1

DBTC (63)——— Enterina 11, Perturbos 8, Añagap 6, Quijano 6, delos Santos 5, Caballero 4, dela Rama 3, Villaver 3, Aldave 2, Colegado 1 Halftime: 45-25

Srs:

UC (76)——— Fajardo 22, Abella 17, Quilantang 11, Pao 11, Ramos 5, Juliane 4, Mohamad 4, Luceño 2

SWU (73)——— Belande 25, Litorja 14, Diango 13, Maguate 9, Pacquiao 5, Jalandoni 4, Ceniza 3 Halftime: 42-39