Niños gisanta sa Barakos

CEBU - Gisanta sa Lipa-Batangas Barakos ang pag-abante sa top seed M. Lhuillier-Cebu Niños pagtikang sa Liga Pilipinas National Finals pinaagi sa 83-74 nga kadaugan niadtong Domingo sa gabii didto sa Lipa City Youth and Cultural Center sa nagpadayong aksiyon sa Smart Liga Pilipinas National Playoffs.

Bisan pa niini, ang Cebu Niños mao gihapon ang nakapabor sa serye sa “best-of-five” semifinal series, 2-1.

Sa pagsuwat niini kagabii, ang Game-4 padayon pa nga gibanatan didto gihapon sa Lipa City.

Kun modaog na sab ang Barakos ni coach Roger Sia mosangko kini sa tinaktakay nga Game-5 karong Septiyembre 13 diha sa Cebu Coliseum.

Ang nagpangagot nga Barakos mipahungaw dayon sa ilang kainit ug milubong sa Niños og 22 puntos paghuman sa first quarter, 32-10.

Ang Niños ni Michel Lhuillier ug coach Raul ‘Yayoy’ Alcoseba nakahimo og pagkitkit sa labaw ngadto na lang sa kuwatro puntos, 66-70 sa katapusang kuwarter.

Apan si Jeff Sanders mikompleto sa iyang three-point play nga nakabalik sa 11 puntos nga labaw sa Barakos, 77-67 diin ang Niños nakahimo og sunod-sunod nga turnovers nga nakaingon sa ilang unang kapildihan sa playoffs.

Si Sanders maoy nangulo sa Barakos sa iyang 20 puntos ug milangkat og upat ka rebounds ug ingon man upat ka assists.

Maayo sab kaayong nakaduwa si Al Vergara kinsa nakahimo og 16 puntos, pito ka rebounds ug walo ka assists.

Si Mark Ababon mao sab ang nangulo sa pilderong Niños sa iyang 15 puntos, gisundan ni Richard Ian Saladaga nga miabuno og 13 puntos. Si Marlon Basco mitampo og 12 puntos uban ang walo ka rebounds.

Ang modaog sa maong series magpaabot sa modaog sa Taguig Batang Global-Misamis Oriental Meteors nga nagtabla karon sa series, 1-1.

Ang Games 3 ug 4 gikatakda sa Septiyembre 10 didto sa Xavier University Gym sa Cagayan de Oro City.

PUNTOS MATAG USA

Lipa-Batangas (83) -- Sanders 20, Vergara 16, Camaso 13, Custodio 12, Estrada 8, David 4, Alfad 2, de Castro 2, Moody 2, Neo 2, Lim 2

Cebu (74) -- Ababon 15, Saladaga 13, Basco 12, Rodriguez 8, Bucao 6, Aying 5, Capati 4, Berame 4, Enriquez 2, Dacia 2, Mepana 1