Nokia-NBTC Developmental League gilusad

CEBU - Ang National Basketball Training Center (NBTC) mohimo sa sunod nilang grassroots development program pinaagi sa Nokia-NBTC Developmental League nga gikatakdang sugdan karong Nobiyembre 8 alang sa Visayas ug Mindanao.

Si NBTC program director Eric Altamirano nagkanayon ang city ug regional-based tournament usa ka follow-up sa individual skills ug team training nga napahigayon niadtong miaging tuig sa Luzon, Visayas ug Mindanao.

Ning sayo, 28 ka teams gikan sa pito mga areas ang nikompirmar sa ilang interes nga mosalmot sa liga nga gipasiugdahan sa Samahang Basketbol ng Pilipinas (SBP) nga gipangulohan ni Manny Pangilinan.

Ang Nokia mo-sponsor sa NBTC Developmental League gikan sa city-based tournament ngadto sa regional championship ug ngadto na sa National Junior Championship.

Gawas sa national teams, ang NBTC D-League magsilbe sab nga agianan alang sa mga linghod nga players ngadto sa higher-level competition sama sa UAAP/NCAA ug ingon man sa professional leagues sama sa Liga Pilipinas.