CEBU - Nilampos si Venacio Loyola, Jr. pagsulod sa grand finals human miposte og sayes puntos sa ikapitong hugna sa 16th Shell National Youth Active Chess Championship Juniors Division niadtong miaging adlaw didto sa SM City, Iloilo City.
Uban ni Loyola nga manulong sa SM Megamall, Mandaluyong City karong Nobiyembre 8-9 mao sila si Argie Nobleza, Joel Pimentel, Allen Mariano ug Maria Jennifer Nacion.
Sa laing bahin, si Noel Vicente Crucero mirehistro og perfect score nga siyete puntos aron sakmiton ang kampiyonato sa kiddies division ug gisundan kini ni Adelaide Lim sa iyang 6.5 puntos. Laing nakalusot sa maong torneyo mao sila si Virgen Gil Ruaya, Jocel Secugal ug Ralp Renza Otero.
Ang mga chess players kinsa napakyas alang sa Iloilo leg may kahigayonan pa nga makasalmot sa grand finals sa higayon nga makalusot sila sa laing qualifying tournament karong Septiyembre 13-14 didto sa SM City. - BANAT