Donaire nangandam maayo alang sa iyang title defense

CEBU - Subsob nga ensayo ang gihimo karon ni International Boxing Federation (IBF) flyweight champ

ion Nonito 'The Filipino Flash' Donaire agi'g pagpangandam alang sa umaabot niining mandatory title defense batok ni South African Moruti Mthalane karong Nobiyembre 1 didto sa Honda Center, Anaheim, California.“A pretty good workout. Today I feel like a beast. I am training really, really hard and feel really good,” matud ni Donaire.

Kauban ni Donaire sa iyang pag-ensayo didto sa Top Rank Gym mao ang iyang amahan nga si Nonito Donaire Sr. kinsa mibarog usab isip trainer.

Si Donaire mihulagway ni Mthalane sama sa “Dingo,” usa ka matang sa ihalas nga iro nga magsige'g dagan apan dili maluya tungod sa taas nga resistensya.

“They know I got the power but in terms of stamina I want to be at that level or even higher,” sumala pa ni Donaire, kinsa naningkamot usab nga madugangan pa ang iyang resistensya.

Kun kusog ang hisgutan klarong modaog si Donaire, apan mas taas og resistensya si Mthalane hinungdan nga naalarma ang Pinoy boxer ug naninguha nga mapun-an ang iyang resistensya aron iyang mapilde ang South African boxer.

Niadtong miaging adlaw, ang 25-anyos nga si Donaire (19-1) mitimbang na og 125 pounds nga nakapakondisyon kaniya.

Kahinumduman, si Donaire mitimbang og 140 pounds sa unang pagdepensa sa iyang korona batok ni Luis Maldonado diin siya pinaagi sa 8th round TKO niadtong Disyembre 1 sa miaging tuig. - BANAT