Talisay Mayor's Cup mosikad ugma

Nahan-ay na ang tanan alang sa mabulokon ug bongga nga opening ceremonies sa Talisay City Mayor's Cup 2008 Basketball Tournament nga buksan ugma diha sa Talisay City Sports Complex.

Katloa'g usa (31) ka teams nga gibahin sa duha ka dibisyon -- Inter-Barangay (seniors) ug Sangguniang Kabataan (SK) ang nikompirma sa ilang partisipasyon atol sa organizational meeting nga gipatawag ni league organizer ug Talisay City Sports Commission (TCSC) chairman ug City Mayor Socrates 'Soc' Fernandez, co-chairman ug City Councilor Rodi Cabigas uban ni Talisay City Sangguniang Kabataan Federation President April Marie Cabigas.

Dose ka teams ang magtigi sa Inter-Barangay nga gibuak sa tulo ka brackets, samtang 19 ang magsambunot sa SK division nga gibahin sab ngadto sa upat ka brackets.

Ang defending champion Tabunok 2 maoy mangulo sa Inter-Barangay division uban sa Tanke, Poblacion 2 ug Pooc alang sa bracket-A. Poblacion 1, Cansojong, San Isidro, Biasong alang sa bracket-B ug Dumlog, Tabunok 1, Lawaan 3 ug San Roque alang sa bracket-C.

Sa SK division, nagpundok sa bracket-A mao ang Tanke, Camp 4, Lawaan 2, Tabunok 1 ug Lawaan 1. Ang bracket-B gilangkuban sa Linao, San Roquez, San Isidro, Poblacion ug Pooc, nag-uban sa bracket-C mao ang Dumlog, Jaclupan, Biasong, Mohon ug Maghaway ug ang naglangkob sa bracket-D mao ang defending champion Lagtang uban sa Cansojong, Tabunok 2 ug Lawaan 3.

Ang makampiyon sa seniors division mobulsa og P25,000 plus trophy ang second placer makadawat og P20,000 plus trophy ang third placer makaangkon og P15,000 plus trophy ug ang fourth placer  gantihan og P10,000.

Isip kabahin sa developmental competition, ang tanang player sa matag team gikan sa Senior division modalit og pasundayag pinaagi sa sayaw nga modugang og kinabuhi sa maong kalihukan ug molingaw sa mga katawhan.