Domingo modepensa sa iyang bakus batok Vorapin

CEBU - Laing kasaysayan ang mahitabo sa dakbayan sa Sugbu sa natad sa paugnat sa kusog karong Septiyembre 14 gumikan kay sa labing unang higayon mo-host kini og boxing event nga himuon sa alas-9:00 sa buntag diha sa Cebu Coliseum.

Ang boxing event makita live pinaagi sa satellite sa silingang mga nasud sa Asya sama sa Thailand, Cambodia, Malaysia ug Vietnam. 

Si Michael ‘Sunday Punch’ Domingo (36-14-2, 15KOs) modepensa sa iyang World Boxing Organization (WBO) Oriental bantamweight title batok ni kanhi world champion Ratanachai Sor Vorapin (73-10, 49KOs) sa main event sa “Daytime Boxing: Philippines vs. Thailand.”

Mao kini ang unang pagdepensa ni Domingo sa WBO regional belt nga iyang nasakmit pinaagi sa second round stoppage ni Rivo Rengkung sa Indonesia niadtong Hulyo 26.

Apan ning higayona, makasangka ni Domingo ang mat-ang boksidor sa Thailand nga si Vorapin nga posibleng maoy mahimong babag sa iyang gitinguhang world championship glory.

Ang nanggungis nang boksidor nga si Vorapin nga adunay 83 ka away, milangkat sa WBO bantamweight crown dihang iyang gipilde si Cruz Carbajal sa Mexico niadtong 2004. Iyang napanalipdan ang korona batok ni Mauricio Martinez sa Panama sa 2005.

Hinuon, si Vorapin nahuboan sa iyang korona dihang miyukbo kini ni Jhonny Gonzalez sa Mexico atol sa labing unang Boxing World Cup -- Mexico vs. Thailand niadtong Oktubre 29, 2005 didto sa Desert Diamond Casino sa Tuczon, Arizona.

Molamas sa “Daytime Boxing” slugfest mao ang away nilang Joel de la Cruz vs. Somsak Kokietgym, Rey Labao vs. Amor Tino, Marvin Sonsona vs. Edwin Tumbag ug Julius Alcos vs. Nelson Llanos.

Ang mga tiket mapalit sa tag P500 alang sa ringside, P350 sa lower box, P250 sa upperbox ug P100 general admission. Alang sa ticket reservations, mahimong motawag sa 420-7029, 518- 6615, or 0916-5497184. (Yoyo R. Abayan ug Arnie P. Atuel)